Tura, Feb 16: Bristibar salo, Union Home Minister Amit Shah, skanggipa changna Garo Hills-ona re•bae, re•baenggipa February-ni 27 tariko ong•atenggipa Meghalaya Assembly election-na Tura-ni Don Bosco Higher Secondary School kal•chakramo, BJP-ni candidate-rangna campaign ka•na gita manderangna aganprakangaha.
Ia tom•bimonganio Union Home Minister, jinmana aganprakangengon, batanggimin bilsi bongani gisepo Assam a•dokode bang•bea medical college-rangko kulina man•aha indiba Meghalaya a•dokde da•o bilsi 50 gappilani ja•manoba medical college ge•sakon kulina man•kujaenga ine an•tangni suk ong•gijaniko parakangaha.
Meghalaya a•dokko ‘engine ge•gni’ donggipa BJP sorkari chalaigenchimode bang•a namroro silroroaniko ra•bana man•genchim ineba Shah parakataha.
Ia election-o BJP-ko seoke bilona watatgenchimode Meghalaya a•dokko tangka paisa jakkalsretani grigipa a•dok ong•atna man•gen ineba Union Home Minister ku•rachakaniko on•angaha.
Indita bilsirangna Meghalaya a•dokni bang•a manderangan ma•mong sorkarini scheme-rangko man•tokjaenga ine janapatengon, ia chango BJP-na sorkari rikna cholko on•genchimode ma•mong sorkarini scheme mingantikon a•dokni mande sakpraknan sokate on•gen ine Shah ku•rachakangaha.
Meghalaya a•doko BJP sorkariko rikna man•ode. da•o noksan ong•e chalaienggipa Meghalaya Energy Corporation Limited (MeECL)-oba man•dapani gnang ong•atna man•gen ineba ua aganaha.
Sukrobar saloba Union Minister, Dalu aro Garobadha-ona re•ange BJP-ni candidate-rangna campaign ka•angna sienga.
