Tura, Sep 2: Sukrobar salo, Meghalaya a•dokni Chief Minister Conrad K Sangma, Chief Minister-ni Adviser Thomas A Sangma, West Garo Hills-ni Deputy Commissioner Swapnil Tembe, Superintendent of Police VS Rathore, Tura Municipal Board-ni CEO, dingtang dingtang department-ni officer-rang aro jolo songdongenggipa manderangni mikkango, Urban Affairs department-ni commercial complex aro parking lot-ko Tura-ni A•konggre gittimo nokdonggae on•angaha.
I am proud that my Government has initiated many projects in Tura to develop its infrastructure with the dream of making it one of the best towns in the country. We have a long way to go but we will get there. pic.twitter.com/FS9YGNiieJ
— Conrad Sangma (@SangmaConrad) September 2, 2022
Ia commercial complex aro parking lot-ko nokdonggae on•anganio a•dokni Chief Minister, jinmana aganprakangengon, Garo Hills-ni skotong Tura jillao ru•utbea bilsirangnan maming namroro silroroanirang dongjahachim indiba ia sorkari, bilko jako ra•chenga intalan namroro silroroaniko ra•bana rakbee kamrangko ka•aha ine parakataha.
Smart Town project-ni bidingo janapatengon, ia project-ni ning•o Tura jillako nitoatna aro jillani dingtang dingtang gittimrango donggipa ramarangko tarina gita sorkari, gong kror 55 tangkarangko koros ka•aha ine Chief Minister talataniko on•angenba, gital ramarangko tarina gita gong kror 15 tangkarangko chamataha aro gitcham ramarangko taridapna gita gong kror 13 tangkarangko koros ka•aha ine parakataha.
Tura-o china neng•nikaniko namatna gita sorkari kang•kare kae kam ka•enga ine janapatengon, da•o 60 ba 70 percent-ni gitade manderangni china neng•nikaniko namatna man•aha aro china neng•nikaniko chu•gimik namatsrangna kamko ka•engkua ine Chief Minister parakataha.
Tura jilla ta•raken dal•rorobaenggipa biap ong•a ine janapatengon, jillako nitoatani gnigipa bako, Tura Bazar-ni circular road-ko jako ra•e iana gong kror 5-oni kror 6-mangona sorkari koros ka•na nanggen ine Chief Minister aganaha.
Tura jillani pilak gittimrangnan solar street light-rangko on•gen ine janapatengon, jillako dingtangatna kam ka•anio pilakkon sorkari baksa bakrimchina gita Chief Minister didiataha.
Ong•gija dakgipa manderangni a•sel manderangni nangchongmotgipa bostuni damrang tang•doenganiko champengna nangengani gimin aganangengon, Tura jillao bading chiwalenggipa aro dokkan dakenggipa manderangko police aro district administration baksa bakrimchina Chief Minister didiangenba, uamangko chel•chakna gita pilak nanga dakchakanirangko on•na ku•rachakangaha.
