Tura, Jan 26: India a·songni gipin biaprango gitan Tura-oba a·songni chang 73-gipa Republic Day-ko New Tura-ni Matchakolgre LP School Playground-o maniangaha aro ia salko manianio 2-Tura Parliamentary Constituency-ni MP Agatha K Sangma, mongsonggipa sokgipa ong·e a·songni nisanko badale on·angaha.
Ia manianio 2nd MLP Battalion, DEF, Women Home Guard Volunteers, Don Bosco College NCC Senior Division Female Wing aro Junior Wing Contingent baksana Band Platoon, march past-ko ka·angaha aro march past-ko Parade Commander Pankaj Rasgania dilangaha.
A·songni Republic Day-ko manianio Tura-ni MP Agatha K Sangma, jinmana aganprakangengon, a·songni jakgitelanina an·tangtangko on·kange kam ka·anggipa pagitcham ma·gitchamrangko mittelpilangenba, uamangni kamrangko gisik ra·e a·songni namroro silroroanina kamko ka·china gita manderangko didiangaha.
Meghalaya a·dokko man·aoni bilsi 50 gapahani gimin janapangengon, ia bilsi 50-ni gisepo a·doko bang·en dingtanganiko aro namroro silroroaniko nikna man·aha ine Sangma aganaha.
A·doko namroro silroroaniko ra·bana sorkarini jako ra·enggipa kamrangni gimin janapangskaengon, ru·uta bilsirangonin Meghalaya aro Assam a·dokni simarango meligrikgijanirangchi jolo songdongenggipa manderang neng·nikanirangko chagrongna nangtokengahani gimin a·dok sorkari, ia neng·nikaniko namatna gita Assam sorkari baksa nangrime kamrangko ka·engaha ine Sangma parakataha.
COVID-19 sajinmani somoio sabisini batrikrikaniko champengna gita mikkango donge warachakenggipa manderangko mittelpilangengon, sajinmani a·sel dingtang dingtang neng·nikani aro ra·bianirangko chagrongna nangengoba sorkarini rakbee kamko ka·enganichi a·doko pilakni gitan namroro silroroaniko nikna man·enga ine Tura-ni MP parakataha.
Ia salko manianio dingtang dingtang department-rangni tableau mesokanikoba nikna man·aha aro tableau mesoksusaanio skanggipa boksisko Animal Husbandry & Veterinary Department, gnigipa boksisko Border Area Development aro gittamgipa boksisko Soil & Water Conservation department cheangaha.
Ia chang 73-gipa Republic Day-ko manianio frontline COVID warrior-rangna, kal·susaanio teng·sugiparangna, lekka porao teng·sugiparangna aro gipinrangnaba Agatha Sangma-ni jakchi award-rangko on·angaha.
