Shillong, Aug 24: Umngot Hydro Electric Project-ko a·bachengatna gita sorkarini chanchie ra·baenggipani bidingo Umngot chibima sambajolo donggipa gama-ge·anirango aro tourism sector-na namen neng·nikaniko ra·bachongmotgen ingipao ua joloni dingtang dingtang a·bao gisik on·e kamko ka·enggiparang a·dokni dakchakgipa skotong ministerko gronge ia project-ko ra·pilchina gita changsatai mol·molangaha.
UHEP-ni kosako jegalenggipa Joint Action Committee (JAC)ni manderang ia project-ko ra·pilchina gita a·dok sorkariko su·dodoengachim, indake ong·oba sorkarioni da·odipetde iani gimin maming ka·dongataniko on·na dongkujaenga.
Tourism-ni a·bao saksa bading-chiwalaniko dakanio niksenggipa Alan West-ni JAC-na chakpaaniko on·engon, batanggimin 2013 bilsina skang chu·gimik jadokrangna, chong·motan April jaoni September jaona kingking tourism-ni a·bao maidakgipa neng·nikanirangko chagrongangahachim aro bangki jarango mikkarang komie waani a·sel ia somoimitingo maidake tourist-rangni donggijaniko chagrongna gita nangahachim uarangko gisik ra·atpile aganangaha.
“Indake ong·oba bilsi 2013-ni ja·man obostarang dingtangna a·bachengskaaha, a·jani Umngot chibimako biap man·ani ja·man aro dingtang dingtang dakgipa biaprangko taridapanichi manderangni robregijagipa somoioba chinga tourist-rangko bang·en man·rorona a·bachengaha. Ia Umngot chibimako tarianichi a·song gimikni tourist-rangko maikai gisik salna man·ahachim ian rongtale mesokaha,” ine Alan West janapataha.
A·dokni gamchatgipa gamrangko uamang maming dakeba gimaatna sikja aro ia Umngot chibimako dangtapa ong·ode mikkangchina jajrengsoani gnang ineba ua agandapataha.
Sakgipin, Darrang tourism society-ni chairman, Reachingson Kongwang-ni chanchitangko parakatani gita, tourism-ni a·bao janggi tangani cholrangko dake ra·ani namgipa cholko uamang gimaatna nangnikja ine janapatan baksana, Umngot chibima sambao donggipa songrang aro songni chadamberang mongsongbate bang·batan kam grisa ong·tokani gimino pilakan tourism-ni a·baosa pangchake janggi tangtokenga ineba janapataha.
“Bijoli bikotna gita chiko dim·changahaode namen neng·nikaniko ra·bachongmotgen aro iani bidingo chinga sorkarioniko maming ka·dongataniko man·sokuja indiba ia mamlako ning·tue chanchienba uni bil donga gita uamangna dakchakaniko on·gen aro ia project-ko den·galchina gita cabinet-o chanchigen ine a·dokni dakchakgipa skotong minister ku·rachakaniko on·aha ineba Kongwang agandapataha.
Umngot chibima, jekon manderang Wah Umngot ine ma·sibata, chibimani chi namen grik-jangjang rongtalani giminan Meghalaya a·doko donggipa manderangni nina-rona namnikbatgipa biaprangoni damsa ong·enga. Ua joloni bang·a manderangan ia chibimachi namen dakchakaniko man·enggipa tourism-o pangchake janggi tanggiparangsa ong·a.
Dingtang dingtang a·bao gisik on·e kamko ka·enggiparangni ia chibimako kapenge bijoliko bikotgenchimode uni samtangtangogiparangna aro chi rongtalani gimin mingsinga man·gipa Umngot chibimana mikkangchi kenchakanirang donga ingipao sorkarini chanchie ra·baenggipa 210-MW Umngot Hydro Electric Project-ko raken jegalgiparang dongskaengachim.
