Dibrugarh, April 4: Re·anggipa anti Robibar also Assam-ni Dibrugarh-o bobil dolni kosako nangrime operation-ko dakatenba ULFA(I)ni mande saksa aro bobil dolrang baksa jak donggipa sakgipin mandeko chel·chakgipa dolrang rim·aha.
Assam, Dibrugarh a·jani Joypur police station ning·o donggipa Phaltutola jolo bobil dolni ine chanchichipgipa mandeni silchidare baksa jipjangani gimin ning·joljol koborko man·soenba Spear Corps Warriors baksa a·dokni police-rang nangrime ja·kol sananiko dakatani ja·man, Naharkatia, Jagun songoni saksa bilsi 31 ong·gipa ULFA bobil dolni Yasin Khan minggipako aro bobil dolrang baksa jak donggipa bilsi 33 ong·gipa Bintu Sharma-ko rim·aha aro uamangoniko 7.62 mm pistol pongsa aro rong 4 gullirangkoba man·aha ine koborna parakataha.
Rim·ako man·gipa manderango sing·sandianiko dakon, ULFA(I) bobil dol baksa an·tangtang jak donganiko parakaha aro iani bidingo sandidapaniko dakangchina gita sakgnikon police-ni jako pakwatataha.
Ja·pangoni u·iatani gitade, ULFA(I) bobil dolna kamko ka·enggiparang, upper Assam-ni songadam biaprangoni chadamberangko bobil dolo napatna mande rim·aniko dakna jotton ka·engachim.
