Shillong, Aug 5: Umngot chiringni dam project-ko ra•galani bidingo name talataniko on•china gita Sukrobar salo, Umngot Hydro Electric Project-ko jegalenggipa Joint Action Committee (JAC), a•dokni Power department-o dabiangaha.
Iani bidingo kobor ra•timgipa manderang baksa agangrikengon, Umngot chiringo dam rikna miksonganiko ra•galpilani bidingo sorkari name talataniko on•jaengani a•sel manderang jajatokenga ine JAC-ni dilgipa TR Suchen parakataha.
Suchen-ni parakatani gitade, iani bidingo uamang a•dokni Power minister-na sedoaton, private company-na on•gimin contract-ko sorkari ra•galpilaha inesan Power minister, JAC-na aganchakaniko on•aiahachim aro ian uamangna jajaani ong•engachim.
Power minister-ni JAC-na aganchakaniko on•ani kride, sorkari ia project-ko chu•gimik ra•galpilenga ong•ja indiba Umngot-o dam rikna sienggipa company-ni contract-kosan ra•galengkua ine JAC-ni dilgipa parakataha.
Ia project-ni bidingo sorkari name talataniko on•china gita JAC, Power minister-na sedoattaigen ineba Suchen parakataha.
Umngot chiringo Hydro Project aro dam rikaniko JAC jegalangkugen ineba ua parakataha.
