Shillong, March 23: University Grants Commission (UGC) ni on•gimin niam gitaundergraduateo poraina sienggipa chatro-chatrirangna Common University Entrance Test (CUET) ba porikka ra•na on•enganiara an•chingni chatro-chatrirangna nangchakanirang ong•gen ine education minister Lakhmen Rymbui Budbar salo aganaha. Degree poraina sienggiparang ia porikkako sechengna nanggenchimode mongsongbate songadamni chatro-chatrirangna neng•nikani sokbagen.

Ia porikka ra•aniko NCERT ni on•gimin niam aro ki•taprango pangchakesa ong•ani gimin, uamangni ia namgipa ja•ku de•ani ong•genchimoba an•ching a•doknade kragipa ong•jawakon ineba minister agandapaha. Iarangko nigrike dakna aro nambatako seoke chatro-chatrirangna on•angna a•dok sorkari niroke ka•anggen ineba ua aganaha.