Shillong, April 8: Bilsi 2020-21-o National Eligibility Test(NET), Graduate Aptitute Test in Engineering(GATE) aro Junior Research Fellowship(JRF)-na seokako man·gipa sak 99 chatro chatrirangna mande ra·ani program-ko April 8 tariko University of Science and Technology, Meghalaya (USTM)-ni University Central Auditorium-o ong·atangaha.
Program-o ‘Pay Back Policy ine katta bichong-ko ra·e ong·atengon ian name chu·sokgipa chatro chatrirangko mandera·an baksa mikkangchi susagnigipa chatro chatrirangna didianiko on·a miksongani ong·a. Programo Assam sorkarini Director of Higher Education Dharma Kanta Mili mongsonggipa sokgipa ong·aha aro Sakgipin mongsonggipa sokgipara Ri Bhoi District-ni Deputy Commissioner Arpit Upadhyay ong·aha.
Jemangan a·dokni ba ma·mongni chu·batgipa gadangni porika sesuaani jedake NET, GATE, SLET, IAS aro undakgiparango seokako man·achim uamangna gamgimin fees-rangko university on·pilna ku·rachaka aro un baksa dingtangmancha Coaching-rang on·e didianiko on·a miksongani donga.
Iako ra·gatani miksonganian chatro chatrirangko didina aro chu·a gadangni porikarango name dakchina susaaniko naatani ja·ku de·ani ong·enga unbaksa indaka susaani a·jao chu·sokgipa ong·china Vision 50-ko USTM a·bachengataha ine USTM-ni Chancellor Mahbubul Hoque tom·anio aganaha.
Porainio gisik matsramgipa chatro chatrirang tangka paisachi neng·nikani a·sel chol ong·pagija ong·jana gita ian University-ni on·kange kam ka·ani ong·enga ine Vice Chancellor Prof G D Sharma aganaha.
