Guwahati, Oct 30: Visa-ni niamrangko pe·e toromni bidingo skiprakna gita gipin a·songrangoni re·baenggipa manderangko Assam-ni police-rang rim·enga.
Koborko on·ani gitade, visa-ni niamrangko pe·e Germany a·songoni toromni kamna re·bagipa saksni manderangko Assam police-rang rim·aha aro una skangba, visa-ni niamko pe·e toromni bidingo skiprakna gita Sweden a·songoni re·bagipa sakgittam manderangko Assam sorkari, biaptangtangona watatpilaha.
Iani bidingo kobor ra·timgiparangna talataniko on·angengon, toromni kamna re·baenggipa manderangnade dingtang visa-rangko nangachim indiba ia manderang, tourist visa-rangkosa jakkale toromni bidingo skiprakengani gimin ia manderangko police-rang rim·aha ine Assam Police-ni Special DGP (Law & Order) GP Singh parakataha.
Singh-ni parakatani gitade, visa-ni niamko pe·e toromni kamna Germany a·songoni re·bagipa manderangko Golaghat District Police rim·aha aro uamangoniko dollar 500 tangkako dai dake gamataha.
