Shillong, April 3: Adita salrangna skang Lok Sabha-o, Waqt property baksa nangchapgipa minggni nangchongmotgipa bill-rang chong·motan Waqt (Amendment) Bill, 2025 aro Mussalman Wakt (Repeal) Bill, 2024-ni bidingo chanchirimaniko dakan baksana namnikeba ra·chakangaha. Ia niamrangkoara, Waqt property-rangko jakkalanio rongtalbate aro jakkalsretani ba niamgri sekdrae ra·aoniko champengna miksonge a·bachengataha.
Waqt, ian muslim manderangni ja·rikbaenggipa niam ong·a jeon mande saksa uni gam jin-rangko toromni ba songsalni namgnina indin on·gilaniko daka aro ia niamko Hazrat Umar-ni chasongonin ja·rikbaenga. India a·songo, ia Waqt property-kora jinmani namgnina kamko ka·giparang, muslim-rangni olakkichakram, skulrang, mande gopram biap aro cummunity center-rangna jakkalskaa. Indake ong·engon, a·ako on·enggipa mande a·ani nokgipa ong·osan ia a·ako waqt dake on·a gita man·gen, aro sorkarini ba gipinni a·ako darangba waqt ine parakna gita man·jawa.
Waqt property ba gam jin-rangko jakkalsretaha ba togienba ra·aha ine aganenba, iani bidingo rakgipa niamrangko dona gita nangenga ineba sorkari janapataha. Ia gital niamo, Waqt ine parakna skang ia gam jin on·enggipara mandeara nokgipa chong·mot ong·ama ong·ja uko District Collector name dake nina gita nanggen aro ian sakgipinni a·ako tol·e sekdraani ba a·kanganiko champengna gitaba dakchakgen.
Waqt property ba gam jin-rangko kakket ong·e jakkalaniko name nirokna ia niamko krae tariaha. Ia Waqt property-ko Muslim-rangsan dakna man·engon, muslim ong·pagija manderangba tangka paisani kamrango dakchakaniko on·a man·genchim ong·oba, toromni kamrangode bak ra·na gita man·skajawa.
Bang·a case-rangon, Waqt-ni a·arangko jakkalsretaha ine gital niamrangko nangnikani gimin sorkari aganengon, Delhi-ni Lutyens’ Zone-ni dam 123 gam jin-rangko Waqt-na on·ani, Tamil Nadu-ni 400 acres donggipa mondir-ni a·ako Waqt-ni property ine parakatani aro Karnataka-o hajal 29,000 acres donggipa a·ako bading chiwalani kamrangna para ra·e jakkalskaaniko sorkari mesoke on·angaha. Ia gital niamrangko ra·gatanichi on·gimin a·arangko jakkalsretani aro a·arangko tol·e a·kanganirangko champengna man·gen ine sorkari ka·dongsoenga.
Indake ong·engon, Muslim bebe ra·giparangni institution-rangko mikkang niteesa dakenga inenba opposition dolrang ia bill-ko jegalsoaha. Opposition dolrangni bebe ra·ani gitade, sorkariara dingtanganiko ra·baani inenba gital niamrangni bimungo muslim-rangni bebe ra·anio jakdangdikpae uamangni gisiko kenaniko ra·bana jotton ka·enga. Indake ong·genchim ong·oba, sorkari ia niamrangchi toromni gita bilrangko jakdangdikna ong·ja indiba ian Waqt property-rangko kragija jakkalaniko champengnasa ine janapataha.
Waqt (Amendment) Bill, 2025-ko ra·gataniara, Indian Constition-ni ning·o 5-gipa aro 6-gipa Schedule-ni ning·o naljoke rakkienggipa tribal-rangni a·arangna nangchakeako man·gen aro ian dal·begipa jajrengna nangani ong·enga. Ia schedule-rangchin, a·dokrang jekai Jharkhand, Chhatisgarh, Madhya Pradesh, Rajasthan, Assam, Meghalaya, Tripura aro Mizoram-o donggipa tribal jatrangni a·arangko naljoke rakkibaengachim. Iani gisepon badiaba case-rangode Waqt Board-rang tribal-ni a·arangkon an·tangtangni a·a ine a·kangenba, niam-ni gita dakgrikanirangkoba ong·ataha. Mesokna gita, Telangana-o tribal-rangni 1,700 acres ong·gipa a·arangko a·kange ra·aha jeni daman kror 66,000 mangni gita ong·genchim aro Assam-ni Morigaon a·jao 134 acre a·arangko Waqt property ine a·kangatani a·sel ka·jia ong·aniko ra·baaha. Iandakgipa neng·nikanirangko champengna gita, darangni a·akon Waqt ine parakatna skangba District Collector-ni ra·chakaniko nanggipa gital niamrangko nangchongmotenga. Ia niamrangko, tribal jatrangni a·arangko naljoke rakkina aro niamgri a·a sekdraanirangko champengnasa tariaha.
Kan·dike agangenchim ong·ode, Waqt (Amendment) Bill, 2025-ara tribal jatrangni a·arangko man·chape, niamgri a·arangko a·kanganiko champengatan baksana Waqt property-rangko chong·mot kamrangna jakkalatna miksonganian ong·a.
Na·simang ia video-koba nina man·gen:
Na·simang iakoba poraina man·gen: A·dok sorkari, Tura-ko Winter Capital dakatani bidingo chanchirimaniko dakna all party committee-ko songa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
