Alipurduar, April 9: West Bengalo skanggipa changna Garo mande saksa MP eleksino susana gando ket salkete jaktong gosoenga. Ua Alipurduar Lok Sabha seatna bilakgipa BJP aro Trinamool dolrangko mikkangchakna tarienga. Uan Bengalni salgro jol ong·e, jeon bang·a tribal manderang ge·e game cha·e janggi tangtoka.
MPna susanasienggipa Garo mandeara Uttar Panialgurio donggipa Garo songni Rahul Mrong Marak ong·a. Ua bilsi 34 ong·aha aro Garorangni gisepode West Bengalo skanggipa changna MP eleksino susanasienggipa ong·a.
Game cha·giparang Delhio jing·jengatani ja·mano Modi aro BJPko ra·bie Kisan Mazdoor Sangharsh Partyko bikoataha. Ua West Bengalni dam 42 elakarangon susanasienga.
“Ia a·doko jattangni obostarangko nike, man·gnirangko man·pagijako nike, anga Garorangni aro Alipurduaro songdonggipa gipin tribalrangni ku·rang ong·e politikso napna ja·ku de·aha. Ma·ani chatchiko A·chikrangni de·bewal ia jolo ta·raken gimaangengaha maina uko chel·chake dakgriknagipa darangba gri” ine Rahul Mrong aganaha.
A·chikrangko niatode, Alipurduar jolo Mrongrang bang·bata. Ua jolo songdonggipa gipin A·chik maharini manderang jekai Chisim, Rechil, Tojo, Nekola Sangma, A·gitok, A·we, Adima, Mankin, Raksam aro Chambugongrang uni ja·ku de·anio namnikpaaniko mesokaha.
02-Alipurduar (ST) parliamentary seatna sak 11 candidaterang gnang. Uamangni gisepo BJP aro TMC dolgnian tribal candidaterangna on·aha. Ua jolo tribalrangan bang·bate donga, aro Adivasirang aditan gnang. Indiba BJP aro TMC ua apsan manderangonikon basee party ticket on·ani gimi sualani donggnok, aro Rahulna namgipa cholde ong·skaenga.
“West Bengalode Garorangni ma·achiko chatchi ma·chong de·ani gimaangengaha, maina tribal certificaterangko tarioba ma·achiko chatchi ma·chong seode jegalaia. Ma·ani chatchi ma·chongko seako jegalani gimin pagipani chatchi ma·chongko sena draatako man·enga, aro indaken jatni dakbewal gimaangenga. Iani bidingon anga Parliamento aganchenggen” ine Rahul Marak ka·kimchae aganaha.
“A·chikrang aro Adivasirangna agreba Alipurduaro songdonggipa gipin jatrang, jekai Rabha, Bodo, Gorkha (Nepali) aro Totorang angna chakpaaniko on·enga, maina uamang pilakan jatni ma·ambi aro dakbewal rikbewalo an·ching baksa apsan apsan ong·toka” ine Rahul Marak wagilgija re·mikkanganiko aganaha.
Na·simang ia video-koba nina man·gen:
Na·simang iakoba poraina man·gen: Sonowalna chake Tinsukiao re·jomanio Amit Shah bak ra·paa
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
