Jowai, Nov 22: Re•anggipa Sonibar salo, West Jaintia Hills a•jani Lumpyrdi jolo donggipa Ummulong songo bi•sa sakgniko wa•al kame siatahani gimin Ummulong songo Fire & Emergency Service-ko donchina gita Sombar salo, Lumchyrtoh songni chadamberang, sorkario dabiangaha.
Ummulong songo Fire & Emergency Service-ko dabienggipa chadamberangni parakatani gitade, ia a•sel ong•ani somoio ua songo Fire & Emergency Service donggenchimode, ia bi•sa sakgniko jokatna gita man•genchim.
“Sambao Fire & Emergency Service department donggenchimode Sonibar salo ia a•sel ong•aniko chel•chakna man•genchim aro ua somoio Fire brigade-rang ta•raken sokbagenchimode bi•sa sakgnini gamchatgipa janggirangko jokatna man•genchim,” ine Lumchyrtoh-ni chadamberang parakataha.
Ummulong songo Fire & Emergency Service-ko kulichina gita sorkariko aro department-ko didiangengon, ia jolo Fire & Emergency Service-ko ba komibeoba sub-centre-ko donna ong•ode mikkangchi iandakgipa a•selrang ong•ani somoirango Ummulong songni manderangna namen dakchakani ong•gen ine Lumchyrtoh-ni chadamberang parakataha.
Sonibar salo, Ummulong songo donggipa nok te•sako wa•al kamanio adasa sakgni bi•sarang, janggitangtangko gimaatna gita nangahachim. Ia a•sel ong•ani somoio sianggipa bi•sa sakgnini pagipa Junom Suna aro ma•gipa Mansoki Challam, noko dongjachim aro ua somoio bi•sa sakgnisan noko dongachim. Bi•sa sakgniko nok a•palchini ketenba ma•gipa, ba•ra su•na aro pagipaba bi•sarangni ma•gipako chiringoniko rimna re•angskaahachim.
