Shillong, April 13: West Jaintia Hills a•jani Block 1-o Assam sorkari niam gri ramarangko tarienga ine koborko man•soani ja•man Budbar salo, West Jaintia Hills District Administration-ni official-rang, police-rang baksa ua biapona re•ange rama tarianiko dontongateaha.
West Jaintia Hills a•jani Executive Magistrate WK Kharbuki-ni u•iatani gitade, ia ramako tarienggipa contractor-ara, Meghalaya a•dokni Khasi mandean ong•achim aro ua Block 1-ni ning•o donggipa Umkhyrmi-oni West Jaintia Hills a•jani Khatkasla aro Psiar songona dakanggipa ramako tariengachim.
Ia biapo rama tarianiko kobor man•soani ja•man West Jaintia Hills a•jani official-rang, Riat Kyn-o aro Iurim Biam-ona sokangon, ia ramako tarienggipa manderang baksana a•a cho•na jakkalgipa ostrorangkoba ua biapo nikeaha.
Kharbukhi-ni parakatani gitade, ia ramako tarienggipa contractor-o sing•sandion, ia ramako tarina gita ma•mong sorkari tangka paisarangko chame on•aha aro kamko Assam sorkari ka•atenga ine ua official-rangna parakaha.
Rama tarianiko dontongchina ge•etaniko on•angengon, Meghalaya sorkarini permission-ko man•chengani ja•manosa kamrangko a•bachengpiltaichina gita West Jaintia Hills a•jani official-rang, kam ka•enggipa manderangna ge•etaniko on•angaha.
