Jowai, Nov 11: West Jaintia Hills a•jao truck nokgiparangni dingtang dingtang dabianirangko aro mongsongbate Jaintia Hills-o donggipa cement karkanarangona bosturangko salruraanio damrangko tik ka•na gita Bristibar salo Jaintia Hills Truck Owners Association (JHTOA)-ni tom•aniko Ynniawmer-o ong•atangaha.

Truck-rango bosturangko salrurana gita kilometre-prako aro metric ton (MT)-prako gong 7/- ka•e ra•na gita sorkari u•iatmanahani gimin iani bidingo cement karkanarang baksa chanchirimna, re•anggipa November 9 tarikosan association-ni dilgiparang, JHTOA-ni president Nidamon Chullet-ni dilanichi Shillong-o tom•aniko ong•atangahachim.Bristibar salo JHTOA-ni tom•aniko ong•atani ja•man JHTOA-ni president Nidamon Chullet, kobor ra•timgiparang baksa agangrikengon, sorkarini dongimin damko cement karkanarangba ja•rikna ku•rachakahani gimin uamangni cement karkanarang baksa tom•e agangrikani chu•sokgipa ong•aha ine parakataha.Cement company-rang uamangni godown-rangko Byrnihat-o donpilna gita ku•rachakaha aro uamang JHTOA-ni membor-rangna aro a•dokni truck garirangnade dingtangmancha mikkang nie on•na ku•rachakaha ineba Chullet parakataha.November 15 tarik dipet gital damko, chong•motan kilometre-prako aro MT-prako gong 7/- ka•e ra•na tik ka•giminko ja•rikanggnok aro association-ni membor-rang maiba neng•nikanirangko man•genchimode an•tangtangan president-ko gronge agangrikna man•gen ineba ua parakataha.