Tura, June 12: Meghalaya a•dokona gipin a•dokrangoniko ra•bae palenggipa na•tokrango formalin samrangko man•ani ja•man gipin a•dokrangoniko na•tok ra•bae palaniko sorkari champengatahaoba, West Garo Hills a•jaode na•tokrango formalin samrang dongama dongja uko test ka•ani ba porikka ra•e niani ostrorang dongjae neng•nikanirangko chagrongna nangenga ine ma•sina man•aha.
Ia formalin samrangara, na•tokrangkosan ong•aigija manggisirangkoba soatgija rakkina jakkalgipa sam ong•e mandeo cancer aro uandakgipa ma•manti sabisirangko ong•atna man•achim.
Indake ong•engon, West Garo Hills a•jaode na•tokrangko formalin samna porikka ra•e nigipa ostrorang dongjani a•sel da•o dipet na•tokrangko porikka ra•e nina man•kujaenga ine West Garo Hills a•jani Fisheries Superintendent Resa V CH Sangma, Sombar salo, Hub News-na parakataha.
Na•tokrangko porikka ra•e niani ostrorangko ra•baahaosa bazar antidamrango palenggipa na•tokrango badita formalin samrangko jakkalachim, uko ma•sina man•aignok ineba Fisheries official parakataha.
