Williamnagar, Feb 16: Robibar pringwalo, East Garo Hills a·jani Williamnagar bazar-o wa·al kamchakatenba, te 15-mangni gita dokkanrang, nisigalako man·aha indiba rasong gnange ia wa·al kamanio darangba janggirangko gimaatna ba saknaanirangko man·na nangjaha.
Ia wa·al kamani a·selko police-rang am·sandina a·bachengataha.
East Garo Hills a·jani Superintendent of Police (SP) SA Rynjah-ni u·iatani gitade, wa·alrang Williamnagar bazar-ni biap damgnioni kamchakatahani a·sel wa·alko kimitna man·ningjaha indiba Fire Service-ni manderang rakbee kamrangko ka·anichi wa·alko pring 3:00 bajimango kimitna man·aha.
Ia wa·al kamani a·selko uamang am·sandienga ine u·iatengon, wa·al kamanio komibeoba te 15 ba 16-mangni gita dokkanrang nisigalako man·aha ine SP parakataha.
Ia wa·al kamani koborko Fire Service-ni manderang, Robibar pring 12:22 bajimango man·soaha ine Fire & Emergency Service-ni SP Bruno A Sangma parakatskaaha.
Sangma-ni u·iatani gitade, koborko man·soa bakan wa·al kimitgipa sipairang, ua biapona re·ange, wa·alko kimitna jotton ka·aha aro uandaken pring 1:10 bajimango wa·alko komiatna man·e, pring 3:00 bajimangode wa·alko chu·gimik kimitna man·aha.
Wa·al kamgipa biapona Hub News-ni manderang re·ange sing·sandion, dokkan ning·o aro dokkan a·palo dongipa CCTV camera-rangko hard drive aro monitor baksa cha·uangaha ine ia biapo bite palgipa mande parakataha. Ia CCTV camera-rangko cha·uanggipa manderangan, wa·al kamatanio jak dongna nanga ineba ua an·tangni chanchichipenganiko parakataha.
Batanggimin somoirangode ia bazar-ko nitimna gita Williamnagar Main Market Association, security guard-rangko donachim indiba da·ode security guard-rangko donjahani gimin iandakgipa a·selrangko nirokgipa dongjaha ineba ia biapo dokkan dakenggipa mitam manderang, Hub News-na parakataha.
Ia bazar-ko nirokgipa manderang donggenchimode, wa·al kamaniko champengna man·naba gnangchim ineba uamang aganaha.
Da·ororo Garo Hills-ni bang·a biaprangon manderangni simsakjani a·sel aro bijolirang kamsotani a·sel wa·al kamanirangko nikna man·rongengachim.
Adita salrangna skangsan, Williamnagar Civil Hospital sambao donggipa chonchongipa dokkanrangkoba wa·al kamgopahachim aro iana skang, Tura Super Market sambaoba, bijoli kamsotani a·selan adita te dokkanrangko bon·pile wa·al kamgopahachim.
Na·simang ia video-koba nina man·gen:
Na·simang iakoba poraina man·gen: Khasi aro Jaintia Hills MDC election-o NPP chena ka•dongsoenga: CM
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
