Williamnagar, May 6: Mongolbar salo, Williamnagar Government College-ni bilsi 25 gapaniko maniangaha aro ia manianio, East Garo Hills a•jani Additional Deputy Commissioner (ADC) Dimseritha A Sangma, mongsonggipa sokgipa ong•e bak ra•angaha.
Ia manianio, Williamnagar Govt College-ni Founding Member aro president HN Sangma, gipin membor-rang, RUSA-ni Resource Consultant SR Lyndem, gitcham chatro chatrirang, skigiparang aro gipin sokgiparangba bak ra•angtokaha.
Ia tom•anio, Williamnagar Govt College-ni Principal Rajiv K Marak, rimchaksoani kattarangko aganangengon, ia college-ko private arts college dakesa a•bachengatani ja•man maikai ia college, East Garo Hills a•jao namgipa lekka porako on•e dal•rorobana man•aha, uarangni gimin aganangaha.
Ia program-ko Kusimkolgre Baptist Mondolini Rev Junalson K Sangma, Nokgipako mittelpilanichi a•bachengataha aro uni ja•man college-ni chatro chatrirang, college-ni gitko ring•e manderangko an•saoatangaha.
Ia tom•anio, dingtangmancha Williamnagar Govt College-ni dal•rorobaani bidingo segipa magazine-koba oprake on•angaha.
Ia salko manianio, RUSA-ni Resource Consultant SR Lyndem, jinmana aganprakengon, ia college-ni bilsi 25 gapanina an•tangni namgipa skaniko on•angenba, bang•a college-rangan RUSA-ko namniktoka indiba RUSA-de mitamnasan ka•saaia ine toe aganangaha. Ia college-ni nokrangko rikna gita gong crore 12 tangkarangko man•soaha aro uni ja•man gong crore 5 tangkarangko chamdape on•aha ineba Lyndem aganaha.
Ia college-ni bilsi 25 gapaniara college-ni chu•sokanikosan mesokenga ong•ja indiba batanggimin bilsirango, a•gilsakni seng•aniko on•na gita rakbee kam ka•ani sakkiba ong•a ineba ua aganaha.
Ia tom•anio college-o poraienggipa chatro chatrirangni doka dam•anirangchi ia manianiko ga•subatataha.
Ia tom•bimonganio, Williamnagar Govt College-ni founding membor HN Sangma-ba jinmana aganprakangengon, ia college-ko kulidaldalmiting somoirangni gimin gisik ra•atpilangenba, ia college-na on•gilanirangchi aro bil-jakrangchi dakchakenggipa pilakkon mittelpilangaha. Ia college-na ka•sae on•gilanina Williamnagar-ni gitcham MLA Deborah C Marak, college gate-ko rike on•anina Jonathon N Sangma sagi, ia college-ko kulichengmiting somoirango bang•en on•gilahani gimin Garo Students Union (GSU) aro 4th Grade Union-koba Sangma mittelpilangaha. Ia college-ko kulianio pilak nanga dakchakanirangko on•ahani gimin ua dingtangmancha East Garo Hills a•jani gitcham Deputy Commissioner DP Wahlang aro DC office-o kam ka•enggiparangkoba mittelpilangaha.
Ia salko manianio, East Garo Hills a•jani ADC Dimseritha A Sangma, mongsonggipa sokgipa ong•e jinmana aganprakangskaengon, ia college-ni bilsi 25 gapanina an•tangni namgipa skaniko on•angenba, niksamsoani aro on•kangani gnang kamrangko ka•dilahani gimin Williamnagar Govt College-ni founding membor-rangko mittelpilangaha.
Pope Francis-ni agangipa kattarangko gisik ra•atpilangengon, “Chiringrang, an•tangtangni chiko ringja, bolrang an•tangtangni biteko cha•ja, salrang an•tangtangnade teng•suja aro pulrangba an•tangtangnade similgiparang ong•ja…na•a kusi ong•osa janggi tanganide nama; indiba nang•ni a•sel sakgipinrang kusi ong•genchimosa janggi tanganide nambata,” ine Sangma aganenba, ia kattarangan ia college-ko kulidile on•gipa manderangni kam aro on•kanganiko parapeani ong•a ine parakataha.
Skigiparangko aro ia college-ko kulidile on•anggipa manderangko mande ra•china chatro chatrirangko didiangskaengon, ia college-ni miksonganirangko ma•sigiparang ong•e, an•tangtangni janggi tanganichi mesokskachina Sangma ku•pattianiko on•angaha.
District administration-ni kulie on•gipa library aro coaching centre-ko an•tangtangni namgnina jakkalchina gitaba ua chatro chatrirangko didiangaha.
Na·simang ia video-koba nina man·gen:
Na·simang iakoba poraina man·gen: Mock war drillko Shillong, Jowai aro Turao ong·atchina ma·mong sorkari ge·eta
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
