Williamnagar, July 22: Garo Hills-o bijoliko nambatate on•china dabie, Williamnagar-o donggipa MeECL office-ko salgnina office picketing ka•ani Sukrobar attamo tom•tome matchotangaha.
Ia office picketing ka•aniko Williamnagar-ni GSU, FAF, FKJGP aro AIGU dolrang nangrime dakangahachim aro NGO-rangni MeECL office picketing ka•anio bijolirangko nambate on•anikoba nikskana man•ahachim.
Ia dolbri NGO-rangni parakatani gitade, Garo Hills-na bijoliko nambate on•china, Power department-o mikkang niteani kam ka•giparangko rakkichina, Garo Hills-na MeECL-o chu•onga gita kam ka•giparangko rakkichina, Garo Hills-o kam ka•giparangko Khasi Hills-ona ra•jitangjachina, MeECL-ko chalainio mikkang niteani gri ong•china, Shillong-o donggipa MeECL-ni head office-o A•chikrangkoba kamo rakkichina dabian baksana 2020 aro 2021 bilsirango Khasi Hills-o bang•en kam ka•giparangko rakkiahani gimin Garo Hills-oba kam ka•giparangko rakkidapchina dabie, Williamnagar-o donggipa MeECL office-ko salgnina office picketing ka•angaha.
Indake ong•engon, NGO-rangni dabienggipani bidingo sorkari maming aganchakanirangko on•jagenchimode Sonibar salo, NGO-rang apsan tom•e chanchirimangenba, MeECL-ni kosako dingtang dake jingjengatanirangko dakangkugen ine NGO-rang parakataha.
