Tura, Mar 22: Sukrobar salo, World Tuberculosis Day-ko, District TB Hospital, Tura-o maniangaha.
Manianio, West Garo Hills a•jani Retd. DTO Dr. E A Sangma mongsonggipa sokgipa ong•enba bak ra•angaha. Una agreba, Garo Hills a•jani Joint Director Dr. I A Sangma, ART Centre Tura-ni Medical Officer Dr. Iclda A Sangma, ART Centre Tura-ni Nodal Officer Dr. Ramajoni Marak aro dingtang dingtang school-rang jekai, Don Bosco Higher Secondary School Tura, St. Xavier’s Higher Secondary School Tura, Embee Rose Bud School Tura aro Tura Town Bengali School Tura-ni chatro chatrirang, ia tom•anio bak ra•angaha.
Indake ia tom•anio jinmana aganprakengon, Dr. I A Sangma, Tuberculosis ba TB sabisi maikai ong•na man•a, maikai ia sabisiara giproroa aro maikai ia sabisiko chel•chaksona gita man•genchim, iarangni bidingo talate on•angaha. Unbaksana, ua, ia TB sabisiko a•songoniko bon•atanio jak on•e dakgrikpachina inenba sakantikon mol•molataha.
Tura DTO Incharge, Dr. Riksilchi M Sangma-ba, TB sabisini giproroaoniko chel•chaksoani chol ba ramarangni gimin agantalate on•angan baksa, ia TB sabisiko bon•atna kam ka•anio, health worker-rangni dakna nanggnisan ong•aija indiba, songsalo janggi tangenggipa pilakan je dakgipa gadango janggi tanggenchimoba sakantian on•gilpana nanga inenba aganangaha.
Indake mongsonggipa sokgipa,Tura-ni Retd. DTO, Dr. Easter Litha A Sangma, TB sabisiko man•a dipet tarake bon•atna gita, sakantian ku•mong nangrimenba ia sabisini kosako dakgrikna nangenga inenba aganangaha.
Indake ia tom•anio, Quiz aro Essay competition-koba ong•atangjolaha aro ia susaanio, dambri school-rang bak ra•angaha.
Essay sesusaanio, skanggipa biapo, St. Xavier’s Higher Secondary School-ni Ashwarya Mahima chegipa ong•aha, gnigipa biapo, St. Xavier’s Higher Secondary School-ni Adingsa Chibisik S Marak cheskaaha aro gittamgipa biapo, Don Bosco Higher Secondary School-ni Noami G Sangma chegipa ong•skaaha.
Indake, Quiz competition-o, skanggipa biapo, Embee Rose Bud Secondary School, Tura chegipa ong•aha, gnigipa biapo, Don Bosco Higher Secondary School, Tura cheskaaha, aro St. Xavier’s Higher Secondary School, Tura gittamgipa biapko man•skaaha.
Tura-ni TB Hospital-o me•asarangna dam 20, me•chikrangna dam 20 aro MDR-na dam 10, chu•gimik dam 50 sanani biaprang gnang.
West aro South West Garo Hills a•jarangni ning•o gimik gimang sak 339 TB sabisiko man•giparang dongaha inenba nikna man•a.
Na·simang iakoba poraina man·gen: MHRC, 2018 bilsioni on•kugijagipa ex-gratia payment-ko watatna ku•rachaka
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
