26.3 C
Tura
spot_img

132.8 million dollar tangkarangko jakkale Meghalayao biljolini bilrangko namdapatgen

Must read

Shillong, Dec 1: Meghalaya a·doko bijolini bilrangko bilakdapatna Asian Development Bank (ADB) aro Indian Sorkarini gisepo gong 132.8 million dollar tangkarangko ra·srona soi ka·grikaha. 

Ua tangkarangko Meghalaya a·doko bijolini bilrangko nokantiona, karkana rangona aro badingchiwalani a·damrangona sokataniko namdapatna jakkalanggen.

Tangkarangko ra·sroanio Ma·mong Sorkarini Ministry of Finance ni Department of Economic Affairs ni Additional Secretary (Fund Bank & ADB) Dr. C.S.Mohapatra Meghalaya Power Distribution Sector Improvement Project-ni palo soi ka·ahaon Asian Development Bank-ni palo Pa. Takeo Konishi, ADB India Resident Mission ni Country Director soi ka·skaaha.

Tangka ra·srogipa lekkao soi ka·grikan ja·mano Dr. Mohapatra, ia tangkarangchi bimang ong·atnasienggipa project a·doko salo konta 24 aro antio sal 7 bijolini bilrangko on·gen aro bil jakkalaniko mesokgipa kol aro uko nie hisape gamna nanggipa dam rangkoba nambatatgen, unbaksana dingtang dingtang kol rangni name kam ka·janio gimaatenggipa tangka paisarangkoba komiatgen ine aganaha.

A·doko bijoliko sokatanio gitalgipa technology rangko jakkale dingtang dingtang bilsi kari rangoba maming neng·nikanirangkon chagrongjawaha aro smart meter-rangko jakkale bilko jakkalani gadangrangko nina aro uko nie una jakkalani dam rangko tarianioba altubatgnok ine Pa. Konishi aganaskaha.

 Meghalaya a·dokni songadam nokadamrangonaba chu·gimik gitan bijolini bilrangko sokatahaomangba bil rangko sualanio gitcham bewalrangkon jakkalkuanichi nanga gita hisape watna man·kujaenga aro iani a·selan bilrangko watanio chotchanganirang ong·ronga uandake tangka sokbagnirangkoba den·penga gita ong·ata.  

 Ma·mong Sorkari aro Meghalaya Sorkari ku·mongrime salo konta 24 aro antio sal 7 chotchanggijagipa bijolini bilrangko pilak bijolini bilrangko jakkalchakram rangona sokatna ja·ku ga·aha ine Ma·mongni Finance Ministryoni u·iataha.

Gitalgipa project ni gita dam 23 sub station rangko taridapgen, dam 45 dongsoenggipa sub-station rangko namdapatgen aro taridapgen; naljokanina aro nirokanio nanggipa pilak bosturangkon donatgen aro bimang ong·atgen aro a·dokko dam dok dake saldulgimin ari-rangoni dam gittamo 2,214 kilometre kasringgrimin bijolini silitingrangko namdapate nokdang 1,80,000 na smart meter rangko chateba namdapatgen.

Kangal cha·asianiko bon·atsrangna ADB Japan Fund oniko tangka gong million 2 dollar rangko man·dapgnigipa biljolini bilrangko namdapate damgittam song aro dam gittam skul rangni me·chik aro songsalo bilgrigipa dolrangna tangka paisarangko man·ani cholko dakchakanggen.

 Project, Meghalaya Power Distribution Corporation Limited (MePDCL) na nambatgipa tangka man·ani ramarangko mesokengon man·ani kri kam ka·anirangba namdaproroangskagen.

 1966 bilsio a·bachenggipa Asian Development Bank -ko dam 49 a·songrangoni sak 68 manderang chalaiengon Asia aro Pacific jolo kangal cha·asianiko bon·atsrangna on·kange kam ka·baenga.

spot_img

More articles

spot_img
-->

Latest article