Shillong, March 23: A·dokni chadamberangna jakma-ba·kuni kamrango changa-sapanirangko skie on·achi uamangna janggi tangani cholko on·na gita 2023 oni 2024 bilsiona sak hajal 20,000 mang chadamberangna skie on·na nisanko donenga aro 2023 oni 2028 bilsiona sak lak 1.2-ko donsoskaenga ine Assembly-o Budget session-na tom·enggipao a·dokni skotong minister u·iatenba, jakma-ba·kuni kamrangko skie on·chakani biaprangko Shillong aro Tura-o gong kror 50 prak ka·e tangka-paisarangko bote rikchakatgen ine parakataha.

Soft Skills Program ASPIRE Meghalaya-ko a·doko ra·gatangkugen aro iana 2023 oni 2024 bilsiona sak 20,000 chadamberangna skie on·na nisanko donsoenga, aro ia program-na gong kror 20 rangko chamenga ineba skotong minister parakataha.

A·dokoni an·tangtangari bading-chiwalaniko dake-ka·e cha·enggipa manderangna dakchakaniko on·na, kamko a·bachengna gita sorkarini on·enggipa tangka-paisa gong lak 5-oniko sakprakna gong lak 7.5 ka·e bariatenga aro sud gri gampilna nanggipa loan-rangkoba gong lak 25 oni lak 50-ona bariatgen ineba skotong minister assembly-o u·iatangaha.

Iakoba poraie nina man·gen: VC-rangni National Conference-ko a·bachengata