Itanagar, Dec 13: A·doko skangonin dongbagipa jatrangni ku·sikrangko Arunachal Pradesh sorkari dal·e ra·enga aro ua ku·sikrangko seani oikorrangko namedake bimang ong·atna gita kam ka·enga, jedakode ua ku·sikrangko agangiparang ku·tangko gimaatgija ma·ambioni ekgija dongkamgen.

Monpa aro Khampti jatrangode an·tangtangni oikor dongani gimin uarangko skie ra·china gita ua jatrangni chadamberangko Arunachal Pradeshni CM Pema Khandu didie aganaha.

Monpa-rang Mahanaya Buddhist ma·mal ong·on Khamptirang Hinayana Buddhist ma·mal ong·skaa. Uamango an·tangtangni oikor gnang ine Khandu aganaha.

Monparang saliramchipak Tawang aro West Kameng districtrango songdonga, Khamptiranga salaramchipak, Assamko an·pagipa Namsai districtrango dongskaa.

“Arunachal Pradesh sorkari a·doko chengonin dongbagipa jatrangni dakbewal aro ku·sikrangko ripingna kang·kare kaa,” Khandu aganaha.

Khandu agankuaha, “Khampti aro Monparang rasong gnange an·tangtangni oikor dongtoka, jerangkon da·o skulrango skie on·enga. Jato pangchake bikotgipa dolrang baksa melie, gipin jatrangnaba oikor-rangko taridapkuna chinga jotton ka·enga, aro uko man·jaode Roman oikorko jakkale see uamangni bi·sarangna ku·tangtangko skie ripingna kam ka·gen, jedakode uamang ma·ambitangtangoni ekjawa.”

Iakoba poraie nina man·gen: West Khasi Hills-o skulni headmaster aro skigipa saksako dakait daka