Shillong, Sept 20: Assam Don Bosco University baksana Genesis Max foundation nangrime an·chingni Meghalaya a·doko re·baenggipa September 24 tarikoni a·bachenge skanggipa changna North East Pride Cup Football tournament-ko ong·atangnasienga.
Ia robol ga·tingsusaaniko ba North East Pride Cup-ko India a·songni salaramchipak donggipa salgro-salaramni damsni (7) a·dokrangoni robol kal·giparangna gadang-gadang dake chong·motan bilsi 14, 16 aro 19-ni ning·o ong·giparangna dingtangmancha 5-aside amateur tournament (knockout round) dake kal·susaatani ong·gen. Kal·susaanio chegipana trophy baksa gong lak 3-ni boksisrangko on·anggen ine u·iataha.
Iandakgipa tournament-ko salgro-salaram jolo ong·ataniara, naljokani gnanggipa aro chu·gimik tariani gnang a·jao robolko kal·susaatna gita miksongani ong·a, unbaksana, kal·susaani a·bao namgipa bewalrangko rakkiani, team spirit-ko ong·katatani aro kal·gipa dolni dilgipa ong·ani gunrang donganiko sakanti kal·giparango namdapatna gitaba ong·jola.
India a·songo Don Bosco-ko ra·bachengani bilsi 100 gapaniko ba centenary-ko maniani aro gisik ra·ani gita India-ni salgro-salaram a·jolo gadanggni dake zone wise chang 19 kal·susaataniko ong·atanggen jeon songjiinma ge·prakni skul aro academy-rang ia robol ga·tingsusaanio bakko ra·china gita kal·gipa dolrangko watatna gita man·gen.
An·chingni Meghalaya a·doko ia tournament ba robol ga·tingsusaaniko Shillong, Mairang, Nongstoin, Tura aro Jowai jillarango sulsul kal·atgen. Indake, on·sogimin biap damprako kal·atgipa changprako chegipa dolrang Guwahati songjinmao Finale-ko kal·susaatgipao bak ra·na cholko man·gen aro uni ja·man North East Pride Cup-o susaangna gita man·gen ine koborna seachi u·iataha.
