Shillong, Sep 20: East Jaintia Hills a•jani Sutnga Elaka-o chalaienggipa dam 12 coke karkanarangna Meghalaya sorkari, maming niamrangko ra•gata dongkujaengani gimin Environment Coordination Committee (ECC)-ni gita mingsku niamrangko sorkarina on•na tik ka•angskaaha.
Iani bidingo kobor ra•timgiparangna talataniko on•angengon, 2020 bilsina skang coke karkanarangko chalaina hukum man•gipa karkanarangna dingtangmancha niamrangko ra•gatchina National Green Tribunal (NGT), Meghalaya sorkarina ge•etaniko on•ahachim indiba ia coke karkanarangna sorkari maming niamrangko ra•gata dongkujaengani gimin ECC-ni gita mingsku niamrangko sorkarina ku•pattie on•na tik ka•aha ine Mongolbar salo, ECC-ni legal adviser Reading War parakataha.
War-ni parakatani gitade, ia Action Plan ba niamrangko ia 2022 bilsini November jana skangan ra•gatna nanggen aro je Coke Oven Unit-rangkon 2020 bilsini December jana skang kulie CTO-ko man•aha indiba dongimin niamrangko chu•sokatna man•jaengachim, uandakgipa karkanarangko ia 2022 bilsini November jana skangan chiptokna nanggen.
Coke Oven Unit-rangko gipin biapona apjitataniara niamni bakan ong•genchimode ia coke karkanarangko Sutnga Elaka ba East Jaintia Hills a•jani ning•o chalaina gita permit-ko on•na man•jawa aro Sutnga Elaka-ni ning•o donggipa biaprangko industrial ba commercial area ine sorkari parakna man•jawa ineba ECC-ni adviser parakataha.
Mikkangchi Sutnga Elaka-ni ning•o coke karkanarangko kulina gita permission-ko on•na man•jawaha ineba War parakataha.
Dongimin somoirang bon•ahaode, pilak coke karkanarangkon pe•galchina gita ge•etaniko on•na nanggen ineba War parakataha.
Niam pe•gipa dam 31 karkanarangoniko dai am•enggipa gong crore 5.5 tangkarangko November jana skangan ra•na nanga aro ia tangkarangko coke karkanarangko chalaiani a•sel nosto ka•a man•gipa songrangna on•skana nanggen ineba ECC parakataha.
Ia jolrango coke karkanarangko chalaiani a•sel da•ona kingking mande sakgni siangna gita nangaha ine janapatengon, ia karkanarangoni jokbaenggipa wal•kuni a•sel ja•delgimin mande saksa aro bi•sa saksa sina gita nangaha ine War parakataha.
