New Delhi, June 7: India a·songni ning·o donggipa dingtang dingtang a·dokrangna coronavirus-ni tikarangko chu·gimik on·na gita ma·mong sorkari daitoko ra·gen ine Sombar salo, a·songni Prime Minister Narendra Modi parakataha.

Prime Minister-ni parakatani gitade, May-ni 1 tariko ra·gatgipa vaccine procurement policy ba tika ra·ani niamrango a·dokrang an·tangtangan bangki 25 percent tikarangko, sam tarigiparangoniko brena gita nangachim indiba da·o a·dokrangni pal ma·mong sorkarian tikarangko ra·e a·dokrangna indin tangka paisa gri on·atskana siengaha.

“A·dokrangna pakwatgimin 25 percent-ni kamrangkoba chinga jako ra·gen aro iako chinga antignini gisepon chu·sokatgen. June 21 tarikonide chinga bilsi 18 batgiparangna tikarangko a·dokrangona indin watatgnok,” ine PM Modi parakataha.

Badita pong tikarangko man·gen, uko tikarangko on·atna antisa skangan ma·mong sorkari u·iatgen ineba Prime Minister parakataha.

“Uni gimin tikarangni bidingo jera ra·grikani aro dingtanggrikani dongna nangja,” ine ua aganaha.