Shillong, July 25: A·gilsakni ding·batroroenganiko dingtangatna gita a·songni Prime Minister Narendra Modi an·tangan kamrangko ka·dilenga ine Robibar salo, Union Home Minister Amit Shah parakataha.
Robibar salo, Meghalaya a·dokni Sohra-o Assam Rifles-ni ong·atenggipa Green Sohra plantation drive ba bol ge·ani program-ko a·bachengate on·angani somoio Union Home Minister, ia kattarangko aganaha.
“A·gilsak gimikon ia sal somoirango ding·a sin·a batroroenganichi neng·nikanirangko chagrongna nangtokengon, India a·songo Prime Minister Modi an·tangan, cholgri me·chikrangna indin LPG-rangko suale on·ani aro uandakgipa dingtang dingtang scheme-rangko ra·gate dingtanganiko ra·bana kamrangko ka·dilenga,” ine Shah aganaha.
Cherrapunji-an a·songo mikka wabatsranggipa biap ong·a ine an·tangni ki·taprangoniko poraimanani gimin gisik ra·atpilangengon, ia jolrango bolrangko den·ani a·selan mikka waanirang rang·san komiangaha aro ian namen jajrengna nangani ong·enga ine Union Minister parakataha.
“An·ching samtangtango donggipa bol wa·arangko skatang den·e galengani a·selan iandakgipa obostarangko nikna nangao ga·akenga. An·ching Cherrapunji-ko India a·songo mikka wabatsranggipa biap ong·atpiltaina sakantian ku·mikchetna nangenga. Ia biaprango sam bolrangko tangatpiltaina gita an·chingni sipai dol, ia bol ge·ani program-ko a·bachengataha aro Meghalaya a·doko pang lak 1.48 bol chararangko ge·dilna gita ia program-ko Assam Rifles jako ra·aha,” ine Shah aganaha.
Ia program-ko ong·atanio Union Home Minister Amit Shah aro Meghalaya a·dokni Chief Minister Conrad K Sangma-ba bol chararangko ge·angaha.
Meghalaya a·doko bolrangko ge·na gita hectare 100 a·arangko seokmanaha aro ia biaprango bol chararangko ge·na gita gong kror 50 tangkarangko jakkalgen ineba ia tom·anio Union Home Minister parakataha.
Meghalaya a·dokni hectare 100 a·arango pang million 1 bol chararangko bilsi gittamni gisepo ge·na gita tik ka·e donmanaha aro ia bol ge·aniko Assam Rifles dakdilanggen ineba Shah parakataha.
“An·ching bol ge·ani program-rangko chu·sokate, ia bol chararangko dal·atna man·ahaode Cherrapunji-ko a·songo mikka wabatsranggipa biap ong·atpiltaina man·gen,” ine ua aganaha.
Bol chararangko dal·atna gitade jolo songdongenggipa manderangni bakrimanirangko nangchongmota ineba ua aganaha.
Jal Jeevan Mission-ko a·bachengatanichi India a·songni manderangna rongtalgipa ringani chirangko on·engahani giminba ua a·songni PM Modi-ko mittelpilangaha.
“Ia project-chi India a·songni mande sakantian rongtalgipa chiko ringna man·china.
An·chingni ringenggipa chirang rongtaljagenchimode an·ching be·enni gita saanirangko man·gen. Uni gimin ia Jal Jeevan Mission project, a·songni manderangna rongtalgipa chirangko on·gen,” ine ua aganaha.
