Tura, May 14: Williamnagar-o niksenggipa Loyola College, Indian Political Structure ba a·songni political-o dingtang dingtang bakrangni nangrime kam ka·anichi bimangko on·atanio media-ni namgnirang ingipao pangchake, mija Sonibar salo salsana William Carey University baksa nangrime Loyola Hall-o seminar-ko ong·atangaha.
Seminar-ona sokbagipa William Carey University-ni niksenggipa manderang, skigiparang aro research scholar-rang baksana gipin sokgiparangko Loyola college-ni Principal Dr Sunny Augustine, rim·chaksoaniko dakangaha.
Ia salsana ong·atanggipa seminar-o William Carey-ni Political Science department-ni Head of Department Ma Yaoreila Angkang, India a·songni jakgitelna skang British-chi sason ka·miting somoionin media-ni dingtang dingtang on·gilbaenggipa kamrangko toe aganangenba, political-ni gitaba a·songni media-ni kam ka·anirang aro on·gilanirangko aganan baksa, an·tangni sandirikkite u·i-ma·sibagiminkoba jinmana parakate on·angjolaha.
Loyola College-ni political science-ni head of department, Pa Imti Nungkum Ao, India a·songo media-ni a·bachengani aro a·songni jakgitel man·na skang manderangko mol·molanio media-ni kam ka·baanirangko aganangskaaha. Uandake, Pa Bartholomeo R Marak, India -o press-ni jakgitelani bidingo talate on·angskaengon, dingtang dingtang dakgipa obosta ba mamlarangni bidingo ja·pangoni koborko parakanio journalist ba kobor separakgiparangni kosako ong·gija kamko ka·anirangni giminba janapjole aganangaha.
Seminar-o gipin bakko ra·angpagipa Rama Pal, India a·songo political aro media-ni gisepo nangrime kamko ka·ani bidingo mongsonggipa kattarangko aganangskaengon, songsalo media-ni namgipa aro namgijagipa kamrangni gimin aro manderangko nina beng·ani gri bang·a dingtang dingtang television programrangko aro advertisement-rangko watani giminba janapjole aganangskaaha.
