Jowai, Oct 08: School aro College-o admission-rangko man·kugijagipa Jaintia Hills-ni chatrorang baksa Jaiñtia Youth Federation (JYF) dol, a·jatangni Kiang Nangbah Govt.
College aro School-o uamangko rakkichina gita sorkariko su·dodonge Jaintia Hills a·jani Education Department-ni Joint Director-ko Sukrobar salo grongangtokaha.
Uko grongangani somoio ia mamlako a·dok sorkari niatgen ine uamangna u·iatenba, jemangan school aro college-rango admission-rangko man·tokkujaengachim uamangni bimingrangko on·china gita Joint Director, grongegipa dolko aganataha.
Indake ong·engon, nanggipa kamrangko ka·na man·na gita admission-rangko man·kugijagipa pilak chatro-chatrirangkon uamangni bimingrangko ia jani 11 tarikon dolni office-o on·etokchina gita Federation mol·molataha.
Unbaksana, iandakgipa neng·nikanirangko namatna man·na gita mikkangchi pangkamgipa cholko gong·raken sandichina JYF dol, a·dokni Education Minister-koba mol·molangjolaha.
