Tura, Nov 18: All India Trinamool Congress (AITC)-ni national general secretary Abhishek Banerjee, skanggipa changna Bristibar salo Garo Hills-ona sokbaaha aro uni salgnina donganganio ua Tura-o jinma tom•bimonganikoba ong•atangaha.
Ia tom•bimonganiko Sukrobar salo, New Tura kal•chakramo ong•atangaha aro ia tom•anio AITC-ni national general secretary aro MP Abhishek Banerjee, jinmana aganprakangengon, India a•songo donggipa dol 1700 political dolrangoni AITC dolmangmangsan, BJP-ko warachakenggipa dol ong•a ine parakataha.
Meghalaya a•dokni manderang, an•tangtangni bilna dakgrikna nanggen ine janapatengon, a•songko bak dakna jotton ka•enggipa sorkariko warachakanio a•dokni mande sakantian jak on•pana nanggen ine Banerjee parakataha.
Da•o jagittamni ja•man election matchotahaon Meghalaya a•doko gital Democratic Progressive Government-ko rikgnok aro ia sorkariko West Bengal ba Delhi-ni manderang ong•ja indiba Meghalaya a•dokni dilgiparangan chalaigen ineba AITC-ni national general secretary parakataha.
Iana skang, ua Bristibar attamchibara, AITC-ni office-ko Tura-ni Teteng A•jao kulie on•angaha aro ia office-ko kulie on•anganio ua TMC-ni chief minister-na Meghalaya a•dokni gitcham chief minister Dr Mukul Sangma-ko minge donangjolaha.
Sukrobar salo, TMC-ni tom•bimonganiko ong•ataniona Garo Hills gimikonin TMC-na kam ka•enggipa manderangba re•batokahani a•sel Tura jillani ramarango garirangni apchangket ong•anikoba nikna man•skaaha aro uandaken kam nangana re•ruraenggipa manderang neng•nikanirangkoba chagrongna nangtokaha.
Mitam manderangni u•iatani gitade, Sukrobar salo garirang apchangket ong•na nangahani a•sel Tura Chandmary-oni Tura Bazar-ona soknamangmangan konta gittammang nangpilaha.
