Shillong, Sept 1: All Meghalaya Midday Meal Workers dol Education Department-oni japrako man·gniko bariatna ka·dongataniko man·ani ja·mano uamangni jinma asonge sorkarini kosako jingjengatenganiko August 31 tariko ra·galataha.
Kobor ra·timgiparang-na Midday Workers-ni aganchalaitimgipa K L Pariat-ni aganani gita, Education Department-ni Commissioner Secretary Dr B D R Tiwari, Education Department-ni Director Pa Ambrose Ch Marak-ni dongpaanio agangrikna okamaha aro 2022-ni August 11 tariko man·gniko bariatna segiminrangko Finance aro Planing Department-ona watdoatanikoba mesokataha. Uamangni watdoatgimin gita, Meghalaya-o Cook Cum Helper donga gimik sak 18776-na japrako tangka gong 1000-oniko 2000-ona bariataniko April 2022-oni November 2002-ona aro 2023-ni February-oni March jaonaba man·chapjolaha ine Pariat aganaha.
Official-rang baksa agangrikanio ma·sirikani gita ian PM Poshan Scheme-ni ning·o tarigimin gitade Decemeber aro January jaode man·gni dormaha dongjani a·selo jagnikode man·jawa ineba Pariat kobor-na aganaha.
Jensalo Cabinet-o ra·chakgen unon ma·mong sorkarioni 1000 baksa a·dok sorkari 1000-ko on·dape chu·gimik 2000-ko man·gnok ineba ua aganaha.
Song·a channanio LPG Gas-ko on·china dabiani bidingo sing·on, a·dok sorkari iako chu·sokatna man·jawa maina ian PM Poshan Scheme-ni ning·o dongja indiba songjinmarangni skulrangnade LPG-ko on·a sorkari kam ka·gen ine ku·rachakenga ineba Pariat agandapaha.
Sorkari baksa agangrikani ja·man jingjengtaniko dontongate kamtangtangona pilangenga indiba ku·rachakatangko be·en pilatjaode re·baenggipa December jaoni jingjengataniko daktaigen ineba Pariat Kobor-na aganaha.
