Jowai, Oct 07: Re·baenggipa 2023 bilsio ong·gnigipa eleksino NPP-ni candidate ong·e susanasienggipa Pa Stephanson Mukhim-na chakpaaniko on·na gita dolo napna re·bagipa gitcham MLA Pa R.L Tariang baksana gipin gital memborrangko Sukrobar salo Amlarem Block-o tom·aniko ong·atenba National People’s Party (NPP) rimchaksoaniko dakangaha.
Gitcham MLA Pa R.L.Tariang aroba District council constituency-rangni MDC-rangni NPP dolna chakpaaniko on·anichi susanasienggipa candidate Pa Stephanson Mukhim-na mikkangchi ka·dongdapaniko ong·anggen ine nikna man·enga.
Rimchaksoani programko, West Jaintia Hills district-ni NPP dolni padot aro Jowai-ni MLA Pa Wailadmiki Shyll, JHADC-ni MDC, Pa Stephanson Mukhim-maangni dongpaanio Amlarem, Syiem Jingsuk Higher Secondary School-ni Hall-o ong·atangaha.
Unomiting, NPP dolona re·baani a·selko talate on·angengon, da·o MLA ong·enggipa Pa Lakhmen Rymbui-ni a·joltangna maming namdapanirangko ra·baaniko nikja gimin ong·a, unbaksana, Pa Rymbui-ni kosako salantin gita dakpile matnanganirangkoba nikenga ine Pa R L.Tariang parakataha.
Pa Wailadmiki Shylla-ni tom·ao bakko ra·giparangna agananganio, NPP dolchi rikdilenggipa MDA sorkari, batanggimin somoio sorkariko rikanggipani gale donanggipa scheme-rang jekai a·dokni manderangna namgni ong·gipa niamrangko ra·gatanio ba, sima-arini kajia-golmalrangkoba matchotatna raken kamrangko ka·aha ine parakangaha.
Uandake, Pa Stephanson Mukhim, skang 2013 bilsio gitan una chakpaaniko on·taichina manderangko mol·molangenba, re·baenggipa eleksino seokako man·ode galchipe donenggipa kamrangko chu·sokatna man·gen aro constituency-na bang·a namroro-silroroanikoba ra·badapna man·gen ine aganangskaaha.
