Williamnagar, Jan 14: East Garo Hills a•jani headquarter Williamnagar jolrango songdongenggipa manderang, gipin biaprangoniko ra•baenggipa me•su samjakrangosa pangchakbata aro ia me•su samjakrangara samrangko jakkale ge•giparangsa ong•ani gimin mandena namgijako ra•bana man•a. Indake ong•genchimoba da•o January ja sokbaahaon, Williamnagar jolrango songdongenggipa manderang, sambao donggipa Ampangdamgre songonikon namnamgipa aro gital me•su samjakrangko bree cha•na man•taiengaha.
Ia chonbegipa Ampangdamgre songni manderang, bilsiantian ong•telaigipa a•salrangchisa me•su samjakrangko ge•a aro uamangni ong•telaigipa a•salrangchi me•su samjakrangko ge•aniara ia songni manderangnasan ong•aigija Williamnagar aro wilwilao donggipa dingtang dingtang songni manderangnaba namgni ong•skaenga.
Ia Ampangdamgre songara Simsang chirikamo donggipa song ong•e, game ge•e cha•enggipa manderangna bang•en namgnirangko on•enga aro uandaken me•su samjakrangko ge•anioba, songni manderang namgipa a•sal baksana chu•onga gitan chirangko man•e, cha•togipa aro be•enna namgni ong•gipa me•su samjakrangko man•enga.
Gipin biaprango game ge•e cha•giparang, me•su samjakrangko samrangchisa sile dal•atengoba Ampangdamgre songni manderangde, samrangko jakkalgija ong•telaigipa a•salrangchisa me•su samjakrangko ge•enga aro ian jolni manderangna bang•en namgnirangko on•skaenga.
Ia Ampangdamgre songni mitam bi•sarangde Williamnagar-ni Loyola School-on poraitokpaenga indiba ia bi•sarang, maming kraatcha•ani grian, dingtang dingtang biaprango me•su samjakrangko pala sim•anio, an•tangtangni ma•a paarangna dakchake on•enga. Me•su samjakrangko pala sim•anio ia bi•sarangni dakchakanichi, ma•a paarangni bal bojarangko komiatasan ong•aigija ian chasong gitalni bi•sarangna aro chadambeskarangna namgipa dakmesokaniba ong•enga.
Ia ong•telaigipa a•salrangchi ge•gipa me•su samjakrang, gipin biaprangoniko ra•baskaenggipa me•surangna bate dam rakbatengnaba gnang indiba ia me•su samjakrangko maming sam jakkalani gri ge•ani gimin ian mandeni be•en aro an•china namgniko ra•baskana man•a.
Uni gimin ia songo ge•gipa me•su samjakrangko bree cha•anichi ian an•tangtangni an•seng baljokanina namgniko ra•baanisan ong•aigija, jinmani namgnina chanchie kam ka•gipa manderangna dakchakskaani gitaba ong•enga.
Na·simang ia video-koba nina man·gen:
Na·simang iakoba poraina man·gen: Assam-o matcha bigil badingsrukgipa saksako rim•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
