Shillong, Aug 31: Doltangni ba an·tangtangni man·gnina United Democratic Party (UDP)-ni membor-rang, sorkarini department-rang baksa politics kal·jawa ine Mongolbar salo UDP-ni dilgipa aro a·dokni Home Minister Lahkmen Rymbui parakataha.
National Highway-rango tangka gile UDP dol, Home department-ko jakkalsretaha ine adita salrangna skang Meghalaya Pradesh Congress Committee (MPCC)-ni gital president Vincent H Pala, matnangahani gimin Rymbui, ia kattarangko aganaha.
MPCC-o president-ni kamko jako ra·ani ja·man Pala iandakgipa kattarangko aganaha ineba Rymbui, an·tangni suk ong·gijaniko parakataha.
“Officer-rang niamo pangchakesa kamko ka·na nanga aro niamni ning·o kamko ka·na nanga,” ine ua aganaha.
Congress dolni dilgiparang, an·tangtangni kamrango chu·sokgipa ong·jaengani giminsa iandakgipa matnangani kattarangko aganenga ineba UDP-ni dilgipa parakataha.
“Congress dolni membor-rang maming bil dongjahani giminsa iandakgipa matnangani kattarangko aganenga. Ia pilakan uamangni suk ong·gijaniko mesokanisa ong·a,” ine Rymbui aganaha.
Home minister-ni kamoniko watchina uni mol·mole seatgipa chittiko da·o Chief Minister niengkuani gimin da·o dipet ua a·dokni home minister ong·engkua ineba Rymbui parakataha.
