Shillong, May 15: Official garina on•gipa registration nomborko an•tangni gario jakkalsreta ine gitcham police Assistant Inspector General (AIG) GK Iangrai-ni matnangenba FIR ka•aniko jegalchina gita mol•mole, Meghalaya a•dokni Director General of Police (DGP) Lajja Ram Bishnoi, Meghalaya High Court-na sedoataha.
Iani bidingo Meghalaya HC-na sedoatengon, uni kosako ka•gipa FIR-ara rakkie donna man•gipa ong•ja aro ia FIR-ko jegalatna nanga ine DGP didiataha.
Kamko ka•engmiting somoio gitcham AIG ong•gija dakanina kam dontongatako man•ahani giminsa uni kosako a•jak sokpangpilna ia FIR-ko ka•aha ineba Bishnoi parakataha.
An•tangni garini registration nomborko jakkalsretaha ine matnangenba, re•anggipa May-ni 9 tariko gitcham AIG GK Iangrai, a•dokni DGP LR Bishnoi-ni kosako FIR ka•doangahachim.
Iani bidingo Sadar police station-o FIR ka•doangengon, 2022 bilsio inquiry committee-ni report-o janapani gita central workshop-o park ka•e dongipa Hyundai Verna-ko ua (Iangrai) register ka•gija tol•gipa nombor-rangko on•e an•tangni kamrangnasa jakkalaha ine parakanikoba Iangrai jegalatahachim.
Iani bidingo aganchakaniko on•atengon, inquiry committee-ni membor-rang, biapona re•e nigija aro Transport department-ni record-rangko nichenggijasa report-rangko tariaiaha ine Iangrai matnangataha.
Gitcham AIG Iangrai-ni parakatani gitade, re•anggipa 2023 bilsio uni RTI ka•e am•sandion, inquiry committee-ni janapgipa Hyundai Verna gariko Transport Department-o register ka•e ML-02A 0001 registration nombor plate-ko man•aha aro iakon DGP-na office-ni kamna on•aha ine ma•sina man•ahachim.
2022 bilsio, Meghalaya a•dokni DGP ong•e kamko jako ra•na re•bachengani somoio DGP Bishnoi, Assam sorkario register ka•gipa gipok Kia Carnival Limousine model gariosa re•baahachim indiba da•o ua ia gario, Verna Hyundai-na register ka•gipa ML-02A 0001 nomborkon jakkalskaenga ineba Iangrai matnangataha.
Meghalaya a•dokni DGP-na gong lak 12 ong•gipa damonasan garirangko jakkalna niamrang dongaiachim indiba DGP Bishnoi-ni jakkalenggipa Kia Carnival Limousine garide gong lak 40-mang gapa ineba Iangrai matnangataha.
Apsan daken, uni kosako inquiry-ko dakgipa committee-ni membor-rangkoba ua matnangataha aro uamangni kosako rakgipa ja•kurangko de•china FIR-o didiatahachim.
Indake ong•engon, DGP-ni kosako FIR ka•aniko Police department register ka•aha aro da•o niam gita am•sandianirangko dakengaha ine a•dokni Deputy Chief Minister aro Home Minister Prestone Tynsong parakatskaaha.
Na·simang ia video-koba nina man·gen:
Na·simang iakoba poraina man·gen: Assam sorkari, chi banna re•aniko champengna sorok baksa ban-ko tarianggen
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
