Guwahatai, Feb 28: Re·baenggipa March 27 tarikoni gadang-gittam dake Assam a·doko Assembly-na pu·onaniko dakangnasienggipana Rashtriya Janapta Dal (RJD), kragipa dolrang baksa bakrimna cholrangko niamenba a·dokni eleksino bang·gija seat-rango susaangna gita mangsongenga.
Eleksinna skang agan-golpogrikanirangko dakna gita Rashtriya Janata Dal (RJD)ni dilgipa aro Bihar assembly-o warachakgipa dolko dilenggipa Pa Tejaswi Yadav, Sukrobar salonin Guwahati-ona re·bae dongkamenga.
Indake ong·engon, Bihar-ni ja·man Congress dolchi dilenggipa dingtang dingtang political dolrang gimik dol-dokni nangrimgimin Mahagathbandhan-ba Assam a·doko ja·dil su·chakatahani gimino re·baenggipa eleksino susana gita dolna maming pangchakani grioba RJD, ia bakrimgimin dal·gipa dolni bak ong·pagen ine koborrangoniko knasona gita man·enga.
Congress dol, RJD baksa bakrimani gisepon dal·gipa bakrimanio bak dongpagipa Pa Badaruddin Ajmal-chi re·dilenggipa AIUDF dol baksaba skango Pa Lalu Prasad Yadav-ni somoirangonin meli-nangrimani namgipa bak-rengsiko rakkibaenga.
Re·baenggipa March 27 aro April 1 aro 6 tarikrango gadang-gittam dake Assam-o pu·onaniko ong·atangnasigipao a·dokni mitam bakrangoniko adita bang·a vote-rangko Bhojpuri-rangoniko man·angna ka·dongsoengon, Pa Tejaswi Yadav-an Congress dolna campaign-rangko mongsonggipa ong·e ka·angnaba donga ine nikatna man·enga.
Assam a·dokni mitam bakrango donggipa vote pu·onggipa Bhojpuri jatrang bang·aan BJP dolna chakgiparang gnang.
Iani gisepon, re·anggipa chango Bodoland-na pu·onatanio BJP dol baksa bakrimanggipa aro Pa Hagrama Mohilary-ni dilenggipa Bodoland Peoples Front (BPF) jean ja·mano cha·bokako man·aha, ua dol baksaba Pa Yadav meli-nangrimaniko rakkkienga. Indake, Pa Tejaswi mija jao mangmang Pa Hagrama-ni okmatako man·e ge·sa tom·anioba bak ra·eaha.
