Shillong, June 28: Assam aro Meghalaya a·dokni simarango meligrikgijanirangko namatna gita Meghalaya sorkari rakbee kamrangko ka·engoba, bilsi 49 ong·pile meligrikna man·gijaniko namatpilna gita maming cholrangko man·teljaenga ine nikna man·enga.
Indake ong·engon, da·o dipet ia neng·nikanirangko namatpilna gita official-rangni gadango agangrikanirang dongkujaengoba Assam aro Meghalaya a·dokko dilenggiparangni gisepo meli nangrimanirang dongskaengani gimin da·o iani bidingo agangrikna namgipa somoi ong·engaha ine Sombar salo, Meghalaya a·dokni Chief Minister Conrad K Sangma, kobor ra·timgiparangna parakataha.
Chief Minister-ni parakatani gitade, ia a·dok damgnini simarango meligrikgijanirangko namatpilna gita India sorkariba jako ra·e kamko ka·enga.
Iani bidingo ua re·anggipa antioba Assam-ni chief minister Himanta Biswa Sarma baksa agangrikaha ine janapatengon, “Ia somoio Assam aro Meghalaya a·dokko dilgiparangni gisepo meli nangrimanirang dongani gimin iani bidingo agangrikna gita ian namgipa somoi ong·enga aro ia neng·nikaniko namatna gita India sorkariba kamko ka·enga,” ine Sangma parakataha.
Assam aro Meghalaya a·dokni simarango meligrikgijaniko ta·raken namatna gita Union Home Minister Amit Shah-ba nangnikenga ine talatangengon, India aro Bangladesh a·song gita dakgiparangni neng·nikanirangkon namatna man·enga ong·ode maini gimin a·songni ning·o donggipa a·dok damgnini gisepo meligrikgijaniko namatna man·jawa ine Meghalaya a·dokni Chief Minister parakataha.
Batanggimin antigittamni gisepo ua gipin kamrangona bate ia sima ario ong·enggipa obostarangnan an·tangni somoiko jakkalbataha ineba Sangma parakataha.
“Oe beben ia neng·nikaniko namatna gita altua chol dongja indiba chinga sorkarini gita ia neng·nikaniko namatna rake kamko ka·enga,” ine Chief Minister aganaha.
