Shillong, Mar 7: Sombar salo, NPP-chi dilenggipa MDA sorkari, pilak political dolni dilgiparang baksa tom•aniko ong•atangenba, Assam aro Meghalaya a•dok damgnini simarango ong•enggipa obostarangni gimin chanchirimangaha.
Pilak political dolrang baksa tom•ani ja•mano kobor ra•timgiparangna talataniko on•angengon, political dolni dilgiparang sorkarini tarigimin report-rangko bi•aha aro sorkari, ia dilgiparangna aditakode talate on•aha ine Chief Minister parakataha.
Chief Minister-ni parakatani gitade, March-ni 9 tariko Assam aro Meghalaya a•dokni chief minister-rangko Union Home Minister Amit Shah, iani bidingo agangrikna okamattaienga aro ia tom•anio uamang, a•dok damgnini simarango meligrikna man•jaenggipa biaprangoni damdok jolrangkoba namatna ka•dongengaha.
“Badiaba biaprangode neng•nikanirang dongkuengani gimin chinga a•dok damgnini gisepo mitamkode songgigrikna man•kujaenga ine anga dilgiparangna talate on•aha aro uamangba ia neng•nikanirangko ma•sichake bakrimanirangko on•na ku•rachakaha,” ine Chief Minister parakataha.
Badiata antirangna skangan, Meghalaya aro Assam a•dok damgnian nangrime report-ko Home Ministry-na on•eahachim ine nikna man•a.
Survey of India aro gipin department-rangko report on•china gita Ministry of Home Affairs (MHA) ge•etaniko on•aha ineba Chief Minister parakataha.
