Guwahati, Feb 9: Manipur Assembly election-ko February aro March jani gisepo bakgni dake ong•atengon, Assam a•dokni Chief Minister aro salgro salaram a•dokrango BJP dolni mongsonggipa dilgipa Himanta Biswa Sarma-ba Budbar salo Manipur a•dokni skotong Imphal songjinmaona sokange BJP-ni candidate-rangna campaign ka•na a•bachengataha.
Imphal sokanga bakan ua Manipur a•dokni dilgiparangko gronge ma•mong sorkarini Union Budget-o salgro salaram a•dokrangna chamgipani bidingo chanchirimangaha aro uni ja•man Manipur a•dokni Chief Minister Biren Singh-koba gronge, election-na campaign ka•ani gimin chanchirimangaha.
Kobor on•timgiparangni u•iatani gitade, 2017 bilsini Manipur Assembly election-oba Sarma-ni campaign ka•anichi BJP dol chegipa ong•na man•ahani gimin ia changoba uni campaign ka•aniara BJP dolna dingtangmanchagipa ong•enga.
Ia chango BJP dol, Congress dolsan ong•aigija NPP dol baksaba susagrikna nangengani gimin Manipur a•dokni BJP dol, Sarma-ko dingtangmancha Manipur a•dokona okamattaiaha ineba kobor on•timgiparang parakataha.
