Guwahati, Mar 16: Re•anggipa jao Assam a•doko bilsi sokgija bia ka•giparangko am•sandie rim•ani ja•man, da•o bilsi sokgija bia ka•aniko champengangkuna gita dingtangmancha Assam sorkarini budget-ko tarianio, ia kamnaba tangka paisarangko chamataha.
Bilsi sokgija bia ka•aniko champengna gita ia bilsio Assam sorkari, dingtangmancha daitoko done, iana tangka paisarangkoba chamataha.
Iani bidingo talataniko on•angengon, re•anggipa jao Assam sorkarini, bilsi sokkugijagipa manderangni bia ka•aniko am•sandianiara jat ba torom baseaniko mesokani ong•ja aro bilsi sokgija bia ka•ana rim•a man•gipa manderangoni Muslim aro Hindu toromni manderangba donga ine Assam a•dokni Chief Minister Himanta Biswa Sarma parakataha.
Assam-ni pilak Gram Panchayat secretary-rangko Child Marriage Prevention officer dake songenga aro jadokprakon Assam-ni police-rang, niam pe•gipa manderangko am•sandie rim•angkugen ine Sarma parakataha.
Bilsi sokgija bia ka•aniko champengna gita Women & Child Development Department-na gong crore 200-ko Assam sorkari chamataha.
