Guwahati, Sep 16: Re•anggipa September-ni 12 tariko, Assam a•dokni Lakhimpur a•jao, bilsi 20-mang ong•gipa chadambe Biki Bishal-ni manggisiko Koilamari Balijan minggipa cha bagano bolo dingdee dongako man•aha aro iani bidingo police-rang mande sakbongako rim•aha ine kobor on•aha.
Sianggipa chadambeni nokdangoni koborko on•ani gitade, sianggipa chadambe Biki-ko September 11 tarik attamo, uni mikchaenggipa Adivasi me•chikni nokdangoni saoba saksa okamatahachim aro ua attamonin ia chadambe gimaahani gimin uko, uni mikchaenggipa me•chikni nokdangonin so•ote uni manggisiko bolo kadingdee donahakon ine chanchichipenga.
Ia a•selni bidingo police-rang, mokordomako segatenba, me•chikni pagipa, mamatang sakgni, ua jolo donggipa mondolini official sakgniko man•chape sakbonga manderangko rim•aha ine kobor on•aha.
Police-rangni u•iatani gitade, sianggipa Biki aro uni mikchagipa me•chikara dingtang dingtang toromoni ong•achim aro uandaken sianggipa chadambeko me•chikni ma•drangrang, me•chikni toromko ra•china draesa ia a•selona sokahakon ine chanchichipenga.
