Guwahati, Jan 18: Assam a•doko salsani gisepon COVID-19-ko man•giparang tang•dopretangani ja•man Assam sorkari, tika su•kugijagipa manderangni skatang re•ruraaniko champengatna tik ka•angaha.
Koborko on•ani gitade, Sombar salo salsani gisepon Assam a•doko sak 6,982 manderang COVID-19 man•dapahani gimin Assam sorkari, tika su•kugijagipa manderangni bazar antirangona aro hotel-rangona re•a doaniko chu•gimik champengataha.
Assam a•doko Bhogali Bihu-ko maniani ja•man rang•san COVID man•giparang tang•doangtaiaha aro ia antini gisepon COVID man•e sianggiparangba sak 11 gapengaha ine kobor on•timgiparang u•iataha.
Assam a•dokni skotong Guwahati songjinmamangmangon salsani gisepo sak 1,491 manderang COVID-19 man•dapaha aro uandaken a•dok gimiko COVID man•giparang salsani gisepon 158 percent-chi tang•doangaha.
Da•on dipet Assam-o lockdown-rangko ra•gatkujaengoba, tika su•kugijagipa manderangni skatang re•ruraaniko Assam sorkari champengataha ine official-rang parakataha.
