Pune, March 14: Assam a•dokko man•chape a•songni dambri a•dokrango aro Union Territory damsaoba Assembly election-ko ong•atna siengani gimin Assam a•dokona agrede gipin damgittam a•dokrango aro Puducherry Union Territory-oba BJP dol amako man•rikgen ine Robibar salo, Nationalist Congress Party (NCP)-ni president Sharad Pawar a•kangataha.
Pawar-ni aganani gitade, Assembly election-ko ong•atna sienggipa a•dokrango aro Union Territory-o ong•enggipa obostarangko niesa ua BJP dolni bidingo ku•watsamsoenga.
West Bengal a•dokni gimin janapatengon, West Bengal a•dokni manderangna saksan warachakenggipa West Bengal a•dokni Chief Minister aro Trinamool Congress-ni dilgipa Mamta Banerjee-ko ma•mongni BJP sorkari, ga•akatna jotton ka•enga ine Pawar matnangataha.
“West Bengal a•dokni manderang an•tangtangko mande ra•gipa manderangsa ong•a aro saoba Bengalirangni daka rikani aro mikkim rasongko pe•na jotton ka•genchimode a•dok gimikan chakate warachakaigen,” ine NCP-ni dilgipa, mikrakataniko on•angaha.
Kerala a•dokni gimin janapatskaengon, Kerala a•doko NCP dolba da•o sorkariko chalaienggipa Left Democratic Front (LDF) baksa nangrimenggipa ong•a aro ia election-o uamang chepiltaigen ine Pawar parakataha.
Pawar-ni aganani gitade, Tamil Nadu a•dokode opposition DMK aro ia dolni dilgipa MK Stalin-na cholrang namskaengani gimin da•o Tamil Nadu a•doko sorkariko rikenggipa AIADMK-ko be•atskanaba gnang.
Assam a•dokni gimin janapatengon, Assam a•doko BJP dolan sorkariko rikengani gimin ia changoba chepiltaiani cholrang dongbatenga.
Assam aro West Bengal a•dokona Assembly election-ko re•baenggipa March 27 tarikonin a•bachengatna siengahachim aro Kerala, Tamil Nadu aro Puducherry-ode election-ko April 6 tariko ong•atskaengachim. Ia biap dambongani result-ko May 2 tariko parakatskana siengachim.
