Shillong, Oct 14: Assembly-o ra·chakna skang niamko ra·gatchengenba Meghalaya Regulation of Gaming Act 2021-ko a·dok sorkari den·galpilna man·gen ine Sukrobar salo, Meghalaya a·dokni Chief Minister Conrad K Sangma parakataha.
“Niamko ra·gatchengani ja·man ia Act ba niamko den·galpilna man·gen aro ja·mano ia niamko Assembly-o pass ka·skana man·gen,” ine Sangma, Gaming Act-ko den·galpilna gita special session-ko ong·atna nanggenma ine sing·anina aganchakaha.
Chief Minister-ni parakatani gitade, niamko ra·gatchengani ja·mansa Meghalaya Street Vendors (Protection of Livelihood Regulation of Street Vending) Act-koba sorkari den·galpilahachim aro ja·mano ia niamko Assembly-o ra·chakangskaahachim.
“Uni gimin apsan daken ia Gaming Act-koba niamko ra·gatchengenba den·galpilna man·gen maina ian niam ong·a,” ine Sangma aganaha.
Toromni dolrangko man·chape dingtang dingtang dolrang Meghalaya Regulation of Gaming Act 2021-ko jegaltokahani gimin adita salrangna skangsan ia Act ba niamko den·galpilgnok ine a·dokni Taxation Minister James K Sangma parakatahachim ine nikna man·a.
Ia Gaming Act-ko den·galpilani bidingo sing·anina aganchakaniko on·angengon, a·doko pilak dakgipa joa kal·anirangon name nirokna gita niamrang dongskajawaha ine Chief Minister parakataha.
Dingtang dingtang dolrang baksa agangrikchengani ja·manosa sorkari, a·dokni namgnina ia Gaming Act-ko den·galpilna tik ka·aha ineba Sangma parakataha.
Chief Minister-ni parakatani gitade, ia Gaming Act-ko den·galpilna tik ka·ani bidingo jinmana parakatna skangba ua Taxation Minister baksa changgnimangna asonge chanchirimaha.
