Shillong, May 12: A·dokni Agricultural Minister, Dr M Ampareen Lyngdoh, Ïewdielang, Ïewduh, chong·motan Shillong-ni Barabazar-ona re·ange Sukrobar salo nirokangenba, uano bading-chiwalenggipa, dokan dake cha·enggipa aro game cha·enggipa manderangming agan-golpogrikangaha.
Bajarona re·ange minister-ni nirokanganiara, game-ge·e man·gipa pilak bosturangna tangka den·aniko ba dingtang dingtang bimango kajinarangko ra·aniko champengatna gita Khasi Hills Autonomous District Council (KHADC)-ni ge·etaniko on·angani gimin ong·achim aro ua somoio Nongkrem-ni MLA Pa Ardent Miller Basaiawmoit, North Shillong-ni MLA Pa Alberth Nongrum aro Hima Mylliem-ni Syiem, Ainam Manik Syiem-maang gimikan minister baksa re·angchapaha.
Ua somoio, agriculture-ko jako ra·enggipa minister, bajaro pilak game-ge·e man·gipa bosturangoniko kajinarangko ra·rongenggipani bidingo pilak game cha·giparang aro dokan dakenggiparang baksa golpoangjolaha.
Nirokanganiko dakani ja·man koborna aganangengon, Ma Lyngdoh, game-ge·e man·gipa bosturangna kajina den·anirangko dontongatna gita nangchongmotenga, maina iachi man·gimin pilak bosturangko bajar-antirangona palna ra·bapaenggipa game-ge·e cha·giparangna bal-boja gitasa ong·aia ine aganangan baksa, KHADC-o ra·chakgimin Bill-ko aro Hima Mylliem-ni office-oni on·anggimin ge·etaniko department-ba namnikpaa, maina iachi a·dokoni game-ge·e cha·enggiparangni balkoba ritchengatchongmotgen aro ia mamlako assembly tom·ao chanchirimaniko naatanina MLA Pa Basaiawmoit-koba dingtangmancha mittelna nangnika ine minister parakangaha.
