Shillong, April 18: CPWD-ni project-ko a·bachengenggipa kamrangko nirokna gita Shillong-o headquarter donggipa All Khasi Hills A·chik Federation (AKHAF), Mongolbar salo re·angaha, uandake, South West Khasi Hills a·jani ning·o donggipa Bagli-oni Maheskhola -ona dakanggipa sima-ari jolni ramako ong·gija aro jakma mingiija kamrang ka·enganiko uamang nikena gita man·aha ine koborna parakataha.
Je project-kon M/s Dilip & Sons company-na black topping on·e ramako taridapchina gita tender-ko on·ahachim, ian sima-ari jolo songdongenggipa manderangni re·ruraenggipa aro bosturangko salrurana jakkalenggipa mongsonggipa rama ong·an baksa, a·song damgnini simarango donge nitimenggipa Border Security Force (BSF)-ba ia ramakon jakkalengachim.
Iani bidingo AKHAF-ni padot Clivestar Ch Marak-ni u·iatani gitade, project-ni biapona re·ange nirokeaniko dakon, ramako tikka ra·giparangni rama tariatani niamko ja·rikgija aro tangka cha·e kamrangko ka·atenganiko nikena gita man·aha.
Sima-ari jolo songdongenggipa manderangni mongsong jakkalgipa ramako tik ong·gija tariatani a·sel manderangni gisepo ua ramako re·na gita kenani ba jajrenganirang ong·enga ine janapatenba, ramako name tarichina gita uamangni dabianiko knachakjaode, federation, ia mamlako a·dokni bil man·giparangona ra·ange contractor-rangni kosako rakgipa ja·kurangko de·atna gitaba mikrakataniko on·angaha. Iani gisepon, CPWD (Road) Shillong-koba gong·rakkale ia mamlako nirokatchina gitaba federation, dabiangaha.
