Tura, March 4: North Garo Hills a•jani Bajengdoba-o donggipa Bakenang Nalsa-o mini stadium-ko rikna gita da•al Bristibar salni bako, Meghalaya a•dokni Chief Minister Conrad K Sangma, pangchakaniko songe on•angaha aro Garo Hills-o git ring•anina mingsing minggamako man•gipa Hamilton Momin-ko mande ra•pilskana gita ia mini stadium-ko Hamilton Stadium minggen ine ia mini stadium-ko rikna gita pangchakaniko songe on•angani somoio a•dokni Chief Minister parakataha.
Ia mini stadium-ko rikna gita pangchakaniko songe on•anio Bajengdoba-ni MLA Pongseng R Marak, Kharkutta-ni MLA Rupert Momin aro North Garo Hills a•jani officer-rangba dongpae bak ra•angaha.
Ia mini stadium-ko rikna gita State Plan Scheme-ni ning•o gong kror 3.85 tangkarangko chame on•enga aro ia mini stadium-o AIFF aro FIFA-ni certify ka•e on•gipa robol kal•chakram, VIP aro kal•susaaniko nigiparangna gallery-rang, gital chasongni gansreani cholrang, media centre, office, gari donchakani biaprang aro dokkanrangnaba biaprangko dongen.
Ia mini stadium-ko rikna pangchakaniko songe on•angani somoio dingtangmancha da•al pringwalni bako a•gilsakko watanggipa Rajabala-ni MLA Dr Azad Zaman-na a•dokni Chief Minister, kalimanikoba dakangjolaha aro duk man•enggipa nokdangna a•dok sorkarini palo ua an•tangni kalimpaanikoba parakangjolaha. Dr Zaman sagina mande ra•pilskaani chin gita jinma minute gnina jrip donge bi•chakanikoba dakangaha.
Ia mini stadium-na pangchakaniko songe on•anganio a•dokni Chief Minister jinmana aganprakangengon, a•dok gimikon kal•susaani cholrangko namdapatna gita Meghalaya sorkari, 2020-21 bilsina gong kror 100 tangkarangko chame donmanaha aro ia tangkarangoni gong kror 3-ko Bajengdoba-na chamataha ine parakataha.
Rama jal•langrangko namdapatani bidingo aganangengon, “2013 bilsioni 2018 bilsiona Meghalaya a•dokni dingtang dingtang biaprango rama jal•langrangko tarina gita gong kror 700-kosan chamiahachim indiba batanggimin bilsi gittamni gisepon MDA sorkari, rama jal•langrangko namdapatna gita gong kror 1800 tangkarangko chame on•aha,” ine Chief Minister parakataha.
Garo Hills-o doka dam•ani aro git ring•ani a•bao bang•beako on•gilahani gimin dingtangmancha Hamilton Momin-ko gisik ra•na aro mande ra•pilskaaniko on•na gita ia Bajengdoba Mini Stadium-ko ‘Hamilton Stadium’ minggen ineba ia tom•anio a•dokni Chief Minister, jinmana parakataha.
Ia stadium-ko an•tangni segipani bimingchi mingahani gimin Hamilton Momin-ni jikgipaba, Chief Minister-ko mittelpilangskaaha.
Garo Hills-ni manderangko mittelpile aganangengon, ia gital stadium-ko re•baenggipa 2022 bilsini December jaon matchotgen ine Chief Minister parakataha.
