Shillong, March 4: Da•al Bristibar salni bako Meghalaya a•dokko nirokna dongimin BJP-ni secretary Chuba Ao, Shillong-ona re•bae Meghalaya a•dokni BJP dilgiparang baksa tom•e chanchirimangaha aro BJP-ni state president Ernest Mawrie-ko ra•galani bidingo jegalataha.
“Mitam manderang uko (Mawrie) ra•galchina nangniktokaha aro gipin political dolrangba uko ra•galani bidingo janaptokahachim. Da•alo chinga dolsan chanchirime kakketko ma•sina man•aha aro uko kamoniko ra•galjana gita jinma tik ka•angaha,” ine Ao parakataha.
Ao-ni parakatani gitade, tom•anio bakko ra•anggipa BJP dolni pilak dilgiparangan Ernest Mawrie-ko BJP-ni state president ong•aoniko ra•galna nangniktokjahachim.
Tangka paisarangko jakkalsreta ine MDA sorkarini kosako Ernest Mawrie-ni matnangenggipani bidingo janapatengon, “Tangka jakkalsretanikode je dolba parake on•na man•aia aro darangkoba champengna man•jawa indiba MDA sorkaria chinga an•tangtangni sorkariba ong•a. Maini gimin chingni dilgiparang iani bidingo jaksiko otaha anga ma•sija indiba ia neng•nikaniko chinga da•o namatna man•aha,” ine BJP-ni dilgipa parakataha.
Tangka jakkalsreta ine matnangenggipani bidingo MDA apsan asonge chanchirimna nangenga maina MDA-ni gisepo ma•sisretgrikanirang dongani a•selsa MDA sorkarini kosako matnanganirang ong•katahakon ineba Ao aganaha.
MDA-oni ong•katchina BJP dolko Meghalaya a•dokni Deputy Chief Minister-ni ra•bigipa kattarangni gimin janapatengon, “Anga an•tangba uni biapo ong•genchimode apsankon agangenchim maina gipinrangonikosa matnanganirangko man•genchimode manderang suk ong•jana gita a•bachenga. Indiba ua saksa namgipa mande ong•a aro NPP-ni state president (Kharlukhi)-ba MDA-o bakrimgipa dolrangko gimaatna nangnikja ine aganmanaha,” ine Ao parakataha.
Chief Minister-ni agangipa kattarangni gimin sing•on, “Basakoba an•ching mi ba maiba cha•anirangko cha•on, an•tangni srekokoba chikmanronga. Mandede gualanikode dakrongaia indiba ian gipinrangona sokangna nangja. Ian chingni gisepo ong•gipa obostasa ong•a aro chinga iako doltangni gisepon namataigen,” ine Ao aganaha.
