Williamnagar, March 4: East Garo Hills a·jani NGO-rang jekai — GSU, AIGU, AAYF, AYC, ASWA, Mothers’ Union, Mothers’ Federation, Auto Association, Pick-Up Association-rang gimikni nangrimgimin dol, East Garo Hills Joint Action Committee (EGHJAC), adita salna skang a·dokni dakchakgipa skotong minister Pa Prestone Tynsong-ni agananggipa kattako raken jegalataha.
Ua (Pa Tynsong) an·tangan tribal ong·e, a·bri jolo songdong-a·chaenggipa manderangni neng·nikaniko u·ieba, u·igija dake gipin jatrangna chaka gnang agananiara gisik sokgijagipani kattasan ong·aia, ine GSU aro EGHJAC-ni padot Saljrang Tengrik R. Marak, Bristibar salo koborna seachi parakataha.
Ua saksa jatni mongsonggipa dilgipa ong·e A·chikrangni kosako indakgipa kattako agangen ine chanchisojachim, indiba da·alo uni agangipa kattako knasoe Garo Hills-ni manderang jagokmanpilaha ine EGHJAC-ni dilgipa suk ong·gijaniko parakataha.
GHADC eleksino gipin jatrangni bak ra·anio niamko walsaonde dingtangatna man·jawa ine agangipa kattara uni gisik grianiko paraka. Uni iandakgipa kattarangchi Garo Hills-ni manderangna namen gisiko sa·dikataniko ra·baaha ineba ua janapataha.
Indake chanchina changgijagipa dilgiparang maming saloba doltangko mikkangchi name re·dilna aro dongimin niam gita a·bri jolo songdongenggipa jatrangna maming chelchakaniko aro naljokaniko on·na man·jawa, maina ua an·tangan a·bri jatni manderangko mikchepe aro onchepe ra·aniko parakaha. Eleksinni somoiode indakgipa dilgiparangan jattangni manderangko chelchakgen aro naljokatgen ine ku·rachakronga, indiba da·alo A·chik jatko galonna gitasa jotton ka·skaenga ineba NGO dilgipa matnangataha.
Saljrang Marak-ni parakatani gita, Garo Hills-o songdongenggipa manderang gipin jatrangni kosako jegale GHADC eleksino susana on·gija champengani ian skanggipa chang ong·jaha, uni gimin gipin jatrangni GHADC eleksino bak ra·aniko champengna gitade pilak political dolrang chanchirimenba A·chik jatni pilak dakbewal-rikbewalrang aro niam-retirangko dingtangmancha tarie ripingna nangchongmota, unosa gipin jatrangna GHADC eleksino tikit chamanirangko aro susaatanirangko champengna man·gen.
