Tura, Jan 28: Sorkario kam ka•enggipa manderangni man•na nangkuenggipa bangki arrear-rangko on•china dabie All Garo Hills Grade-IV Government Employees’ Association (AGHG-IVGEA), Meghalaya a•dokni Chief Minister Conrad K Sangma-na sedoattaiaha.
Koborko on•ani gitade, Fifth Meghalaya Pay Commission-ni 30 percent arrear-rangko, sorkario kam ka•enggiparangna on•kujaengani gimin re•anggipa January-ni 16 tariko Grade-IV employee-rang, Tura-ni Dakkopgre-o tom•e chanchirimangenba, bangki arrear-rangko ta•rake on•china a•dokni Chief Minister-na sedoattaiaha.
Iana skang, re•anggipa bilsini December 10 tarikoba association-ni gita, bangki arrear-rangni bidingo a•dok sorkarina sedoatahachim ine nikna man•a.
“Chingni skanggipa sedoatanina sorkari chingna maming aganchakanirangko on•jahani gimin chinga sorkariko gisik ra•attaina gita sedoattaienga. Ia changode chingni mol•molaniko sorkari knachakgen ine chinga ka•dongenga,” ine AGHG-IVGEA-ni dilgiparang parakataha.
