Shillong, March 16: Atmanirbhar Bharat Abhiyan Scheme-ni ning·o ra·srochengna on·enggipa tangka gong kror 1345.72 mangko gampilna nangani bal-bojarangko a·dokni manderangna ba bijoli jakkalgiparangona sokatjawa ine a·doko bijolini a·bako chu·gimik jako ra·e nirokenggipa ba Power Minister Pa James Sangma, Mongolbar salo Assembly-o ka·dongatani kattarangko on·angaha.

Ra·srona on·enggipa chu·gimik tangkako jensomoio a·doko man·soahaon uni jaantini sudara gong kror 10.65 mang ong·gen ine Assembly-o sing·anirangko dakani somoio ua iako u·iatangaha.

Chotgnigipa grorang bang·en dongkuenggipa company-na ia on·enggipa tangkako ra·srona amchakgnigni gimin Rangsakona-ni MLA Pa Zenith Sangma-ni sing·anganina, ian neng·nikani somoiomitingo DISCOMS-na namgipa scheme ong·a aro iana sudni tangkako gamani baksa neng·nikani somoio gampilna nanganiko dondipatna on·gipanaba mikbokmanpila ine Pa James aganchakaha.

Atmanirbhar Bharat Abhiyan-ni ning·o India sorkarini Agency-rangni MeECL ba MePDCL-na ra·srona on·enggipa chu·gimik tangkara REC Ldt-ni gong kror 672.86 mang ong·a indake Power Finance Corporation Limited-ni gong kror 672.86 mangni gita ong·skaa, indake chu·gimikara gong 1345.72 mang ong·ea ineba ua talataha.

Sing·anina aganchakangkuengon, MeECL ba MePDCL-ni ra·srochengna man·gipa tangkara gong kror 386.87 mang ong·a ine aganan baksa, ra·sroenggipa tangkana sudko MeECL ba MePDCL -ni gamna nanggipara 9.5 percent-mangni gita ong·skagen ineba ua u·iatangaha.
Jaantio chu·gimik nanganiara gong kror 3.06 mang ong·enga ine talatengon, REC Limited-oniko gong 193.43 mangko ra·srona man·enga aro Power Finance Corporation Limited-oniko gong 193.43 mangko ra·srona gita man·skaenga ine Power minister parakatjolaha.